Un octoxenario de Vilalba faleceu onte ao mediodía despois de atragoarse nunha comida que se celebraba nun establecemento hostaleiro da parroquia de San Bartolomeu de Insua, de onde tamén era orixinario o home.
O suceso, que consternou aos clientes que estaban nese momento no negocio, mobilizou a axentes da Policía Local da capital chairega e tamén a unha ambulancia de urxencias médicas, cuxo persoal estivo realizando durante máis de vinte minutos e sen descanso tarefas de reanimación.
Os esforzos dos facultativos foron infrutuosos e finalmente non puideron facer nada por salvarlle a vida ao octoxenario, que recibirá este domingo sepultura en San Bartolomeu de Insua.
ACCIDENTE. Este non foi o único suceso que se rexistrou na xornada deste sábado na comarca chairega. Á mañá, en torno ás 11.30 horas, unha persoa resultou ferida tras saírse da vía no punto quilométrico 37,400 da LU-540, á altura da parroquia xermadesa de Roupar.
O único ocupante do vehículo sinistrado foi trasladado a un centro hospitalario. Tamén acudiron ata o lugar axentes do Subsector de Tráfico da Garda Civil de Lugo.