miércoles. 11.12.2019 |
El tiempo
miércoles. 11.12.2019
El tiempo

Feijóo agradece á Raíña Sofía "o que fixo por España" nun acto na Coruña

Dona Sofía, na Coruña. EFE
Dona Sofía, na Coruña. EFE

A monarca acudiu á celebración do centenario da institución benéfica Padre Rubinos

O presidente da Xunta, Alberto Núñez Feijóo, agradeceu á Raíña dona Sofía, con motivo da súa presenza este xoves na Coruña para conmemorar o centenario da institución benéfica Padre Rubinos, "o que fixo por España e o que queda por facer". As súas palabras tiveron lugar no acto central dun programa máis extenso para conmemorar o centenario desta entidade e que congregou a unhas 200 persoas. Entre elas, estiveron o secretario de Estado de Asuntos Sociais e Igualdade, Mario Garcés, e o alcalde da Coruña, Xulio Ferreiro, ademais do presidente da entidade centenaria, Eduardo Acea.

Entre outras autoridades, acudiron tamén o delegado do Goberno en Galicia, Santiago Villanueva; o presidente da Deputación coruñesa, Valentín González Formoso, o presidente do Parlamento galego, Miguel Ángel Santalices; o conselleiro de Política Social, José Manuel Rey Varela e a conselleira de Medio Ambiente, Beatriz Mato.

Á súa chegada, dona Sofía visitou a escola infantil da entidade onde un grupo de case 40 nenos interpretaron tres cancións populares, coa axuda do seu profesor de música. Após descubrirse unha placa conmemorativa na praza central da entidade, a comitiva trasladouse ao salón de actos. Alí entregouse á institución Padre Rubinos a bendición apostólica do Papa Francisco. Nese mesmo lugar, tivo lugar, con posterioridade aos discursos das autoridades, a entrega á Raíña Sofía da partitura do himno de Padre Rubinos, composto para esta ocasión polo director da Real Banda de Gaitas de Ourense, Xosé Lois Foxo e que se estreou neste acto.

Para concluír, dona Sofía trasladouse ao centro xerontolóxico do que dispón a institución benéfica. Alí, saudou aos anciáns presentes. "Benvida", contestoulle unha das mulleres presentes no acto, mentres que outra lle dixo "es a mellor", palabras recibidas cun sorriso pola Raíña.

ELOXIOS DE FEIJÓO. "Grazas maxestade por todo o que fixo vostede por España e o que queda por facer", aseguroulle, á súa vez, o presidente da Xunta no acto de discursos. "O mellor garante da liberdade, a igualdade e a fraternidade foi a monarquía parlamentaria", expuxo tamén Feijóo ao enxalzar o papel desta.

Así, manifestou que "Galicia navega nun barco estable grazas á Constitución e ao amparo da Coroa", engadiu un discurso no que eloxiou o labor da institución Padre Rubinos. Dela, dixo que é "un faro que emite unha luz de solidariedade".

Na mesma liña asegurou, para reivindicar a importancia das políticas sociais, que "a entidade dunha nación ou comunidade non só se mide por magnitudes económicas, senón polo produto interior de solidariedade". "O que mide a fortaleza é a cohesión", recalcou subliñando, ademais, que "nesta loita -a das políticas sociais- non sobra ningunha achega".

PAPEL DAS ADMINISTRACIÓNS. Pola súa banda, o alcalde da Coruña sinalou que "as políticas sociais constrúen unha cidade" e, puxo como exemplos, a renda social municipal ou a "loita contra a pobreza enerxética".

"As administracións públicas estamos obrigadas a estar pendentes dos que máis o necesitan", subliñou nun discurso no que, como o presidente de Padre Rubinos, reivindicou a importancia de traballar para lograr que persoas que sufriron problemas poidan recuperar "a dignidade". Ademais, enxalzou o labor da institución Padre Rubinos, ao asegurar que a mesma "enraíza" co "xen de xenerosidade" dos coruñeses.

Un grupo destes cidadáns esperou ás portas da institución benéfica para presenciar a chegada da Raíña Sofía, á que nalgunhas vivendas situadas enfronte recibiron con bandeiras de España. Mentres se celebraba o acto no interior da entidade, un grupo de funcionarios de xustiza en folga concentráronse tamén.

A institución benéfica Padre Rubinos foi creada en 1918 para dar resposta aos problemas de mendicidade. Na actualidade, conta cunha escola infantil, un albergue para persoas sen fogar e un centro de maiores, ademais de levar a cabo actuacións no ámbito da inclusión social.

Feijóo agradece á Raíña Sofía "o que fixo por España" nun acto na...
Comentarios