Unha patrulla da Agrupación de Tráfico da Garda Civil do Subsector da Coruña, pertencente ao destacamento de Ferrol, recuperou un cárabo común que se atopaba ferido na autoestrada AP9- F, á altura do quilómetro 30 sentido a Ferrol.
Segundo informou a Garda Civil a través dun comunicado, o exemplar atopábase "ferido e con grave risco de ser atropelado na calzada", coa á rota, "previsiblemente polo impacto contra un vehículo mentres se atopaba cazando".
Despois de rescatar ao animal, a patrulla entregouno na área de mantemento de Audasa, e ingresou no Centro de Recuperación de Fauna Silvestre de Santa Cruz, en Oleiros (A Coruña). Alí, o animal "recuperarase das feridas e dispensaránselle todos os coidados posibles para ser reintroducido no seu hábitat unha vez recuperado".
