A Garda Civil investiga a morte dun veciño do Páramo que faleceu o sábado pola noite na súa casa e por que a súa muller non informou do ocorrido ata o luns. Ocorreu na parroquia de Gondrame deste concello lucense. Ao parecer, a esposa, de nacionalidade británica do mesmo xeito que o defunto, non descubriu o cadáver ata o domingo pola mañá e, cando o fixo, no canto de chamar os servizos de urxencias, contactou co consulado do seu país, polo que a Garda Civil non foi notificada ata o día seguinte.
Segundo informa a TVG, o matrimonio apenas falaba galego ou castelán. A muller foi ingresada no Hula en estado de conmoción e a Benemérita abriu unha investigación. Á espera do que indique a autopsia, as primeiras hipóteses apuntan que o home, de 60 anos, puido falecer por causas naturais.
