O expolítico Benito Rego Cobo faleceu en Lugo aos 85 anos. Foi un home cunha gran proxección social e profesional, que ocupou numerosos cargos de responsabilidade, tanto na política como en entidades privadas.
Foi deputado nas Cortes nas lexislaturas VI e VII, concelleiro en Lugo con Coalición Galega e posteriormente co Partido Popular e vicepresidente da Deputación. Era veterinario de profesión, especialista en reprodución animal, e exerceu como técnico do Centro de Conxelación e Reprodución Animal de Lugo e profesor de Fitopatología durante 19 anos na Escola de Enxeñeiros Técnicos Agrícolas de Lugo. No seu longo currículo, figura tamén que foi presidente do Colexio de Veterinarios de Lugo e o primeiro da Sociedade Protectora de Animais de Lugo.
Estivo á fronte, ademais, da entidade con máis socios de Lugo, o Club Fluvial. Estaba casado con María do Pilar Cadahía, con quen tivo tres fillos: José Benito, falecido; Jesús e Vicente.
Benito Rego será despedido o luns, ás cinco e media da tarde, cunha misa na igrexa de San Francisco Javier.
Este sábado será incinerado na intimidade familiar.
