A pioneira da xenética médica en España, Jimena Fernández de la Vega (Vegadeo, 1895), foi nomeada científica do ano 2021 pola Real Academia Galega de Ciencias. Seu pai foi o castroverdense Wenceslao Fernández de la Vega Pasarín, o primeiro director do balneario de Guitiriz.
A academia valorou o seu carácter loitador "en tempos nos que non era sinxelo ser admitida e recoñecida", segundo destaca, ademais da súa contribución aos campos da xenética e da hidroloxía sanitarias.
Coincidindo coa celebración, este xoves 11, do día internacional da muller e a nena na ciencia, a academia fai público este nomeamento de quen foi a primeira licenciada en medicina pola Universidade de Santiago de Compostela (USC) xunto coa súa irmá Elisa.
Na súa carreira investigadora "tivo o gran acerto de incorporar a xenética ao eido da saúde, sendo unha verdadeira pioneira da xenética médica en España". Despois, os seus traballos no campo da hidroloxía aplicada á saúde foron tamén "de enorme valía".
O acto académico central de homenaxe terá lugar o 8 de outubro con motivo do día da ciencia en Galicia e programaranse durante todo o ano diversas actividades para dar a coñecer a súa figura e as súas contribucións.
