Santalices lembra aos deputados que o seu labor é "representar" aos cidadáns e "non tuitear"

Sospeita que a súas señorías coidan "tanto ou máis a imaxe na procura dunha foto, dun plano pensando na televisión ou nos vídeos de internet, que na oratoria e a calidade do discurso"

Miguel Ángel Santalices
photo_camera Miguel Ángel Santalices

O presidente do Parlamento de Galicia, Miguel Santalices, reivindicou o "xornalismo de calidade" como "único antídoto capaz de contrarrestar os efectos nocivos da desinformación", á vez que advertiu aos deputados de que foron elixidos para "representar" á cidadanía, non para "tuitear" durante as sesións plenarias. 

"Se queremos e aspiramos a dignificar o labor dos parlamentarios, creo que é bo respectar as normas. Que os xornalistas fagan o seu traballo e os deputados exerzan o seu labor: foron elixidos as urnas para exercer unha alta responsabilidade, a de representar aos galegos no poder lexislativo, non para dedicar o seu tempo a tuitear desde o escano, iso pódeno facer noutro momento", avisou. 

Neste sentido, e na inauguración do XVIII Curso Complementario de Comunicación e Protocolo, que se celebra na Facultade de Ciencias da Comunicación en Pontevedra, Santalices indicou que ás veces ten a "impresión persoal" de que desde a tribuna de oradores do hemiciclo "coidar tanto ou máis a imaxe na procura dunha foto, dun plano pensando na televisión ou nos vídeos de internet, que na oratoria e a calidade do discurso". 

Durante a súa intervención, o presidente do Parlamento indicou feito valer o labor xornalístico. Por iso, indicou que, "a pesar das dificultades ás que se enfronta os medios de comunicación", existe un "consenso xeneralizado" que apunta ao xornalismo de calidade "como único antídoto capaz de contrarrestar os efectos nocivos da desinformación que campa ás súas anchas por internet". 

Así mesmo, quen constitúe a segunda autoridade de Galicia reivindicou o "papel transcendental dos xornalistas e dos medios de comunicación" nas democracias avanzadas, como a española. 

Nesta liña, lembrou que o regulamento da Cámara outorga un "papel determinante" aos xornalistas acreditados no Pazo do Hórreo, até o punto, subliñou, de que nin deputados nin público poden tomar fotografías das sesións, mentres si o poden facer os medios de comunicación. 

POLÍTICA E COMUNICACIÓN. En todo caso, Santalices insistiu en que "política e comunicación son dúas realidades indisociables", máis nestes tempos, e apostou pola "comunicación no sentido máis amplo, contando cos novos medios e coas novas demandas sociais". 

Ademais, apostou por unha relación bidireccional, porque "aquel vello esquema no que a cidadanía contemplaba a vida pública como espectadora pasou á historia". "Quen non vexa esta realidade ou se negue a aceptala ten ou terá serios problemas", avisou. 

Santalices lembrou que se aprobou, en 2015, a lei de iniciativa popular e participación cidadá no Parlamento, e tamén defendeu, no seu discurso, os principios de "cortesía e respecto, esencias do protocolo". 

O presidente do Parlamento convidou ao seu auditorio, así mesmo, a "analizar se o protocolo actual" contempla para os deputados un tratamento acorde coa función de representación democrática e institucional que as urnas lle outorgan.