A Consellería de Traballo estrea un novo portal web a través do que as persoas en situación de desemprego poderán selar a tarxeta do paro sen necesidade de pasar polas oficinas. Segundo explicou o conselleiro de Traballo, Ricardo Varela, o 'Portal de Emprego' permitiralle ademais aos usuarios xestionar o seu perfil laboral e coñecer as demandas de persoal por parte das empresas.
Segundo Varela, a nova web quere "favorecer a atención personalizada e áxil" dos demandantes de emprego, intermediar entre as empresas e cidadáns, e reducir o "volume de traballo burocrático" das oficinas do Servizo Público de Emprego.
As persoas dadas de alta no portal poderán, sen moverse da casa, modificar ou imprimir o seu currículum, solicitar información sobre ofertas de emprego e formación ocupacional, comprobar o estado das demandas de emprego e intercambiar información coa súa oficina do Servizo Público de Emprego.
Como complemento á web, a Consellería de Traballo anunciou a instalación de 198 'Puntos de Información Dixital' nos concellos galegos dos que 136 xa están operativos e os restantes se porán a funcionar antes do remate do ano. A través destes terminais, os cidadáns poderán acceder ao Portal de Emprego.