Tenso enfrontamento entre Tellado e Villares polo labor xudicial do portavoz de En Marea 

O secretario xeral do PPdeG díxolle ao portavoz de En Marea que non era "un digno representante da cidadanía" tras ser anulado "o 95% dun fallo ditado polo TSXG" contra a Xunta no que el participara

 

As intervencións do Debate de Estado da Autonomía finalizaron este xoves cun tenso enfrontamento protagonizado polo secretario xeral do PPdeG, Miguel Tellado, e o portavoz de En Marea, Luís Villares, sobre o labor profesional do maxistrado lucense en excedencia.

En concreto, o enfrontamento tivo lugar durante a última intervención do tamén viceportavoz parlamentario do PPdeG, quen aproveitaron a súa intervención para facer referencia a unha sentenza do Tribunal Supremo que, conforme indicou, "anula o 95%" dun fallo previamente ditado polo TSXG no que participaba Luís Villares.

"Vostede ditou unha sentenza contra a Xunta cando xa facía meses que estaba a negociar a súa candidatura... Vostede non é un digno representante da cidadanía pero tampouco de seguir impartindo xustiza", manifestou Tellado en referencia ao maxistrado lucense en excedencia.

Estas palabras motivaron que o portavoz de En Marea, que non interviña este xoves, pedise a palabra para solicitar ao presidente da Cámara, Miguel Santalices, que se Tellado non retiraba as súas afirmacións, estas fosen retiradas pola Presidencia.

Villares: Dicir que foi por razóns políticas é unha incorrección que supón unha acusación gravísima contra a dignidade e función xurisdiccional do TSXG

Así mesmo, Villares destacou que o fallo do TS é "parcialmente confirmatorio" e asegurou que "é formalmente inxurioso" dicir que a sentenza do TSXG "foi ditada por unha persona" xa que "o foi por tres e por unanimidade", 

"Dicir que foi por razóns políticas é unha incorrección que supón unha acusación gravísima contra a dignidade e función xurisdiccional do TSXG", incidiu Villares, que tamén acusou a Tellado de "faltar á verdade" cando di que "é totalmente revogatoria" cando, segundo apuntou, é "parcialmente confirmatoria".

Pola súa banda, na súa resposta á protesta de Villares, Tellado avanzou que deixará unha copia da sentenza á Presidencia da Cámara.

"Anula a súa sentenza nun 95% e dálle a razón nun 5% e fala de abuso de sentenza, de extralimitación", sinalou o dirixente popular, que si aproveitou para "circunscribir a cuestión no relativo ao que dicía o señor Villares" no fallo.

O feito de que o presidente do Parlamento non accedese a retirar as palabras do diario de sesións pero si a introducir as matizacións feitas por Villares provocou as críticas da bancada de En Marea. O enfrontamento derivou en dúas chamadas á orde ao propio Luís Villares e outra ao deputado rupturista Manuel Lago.

Comentarios