Un matrimonio supostamente "forzado" polo líder da extinta Orde e Mandato de San Miguel Arcángel, Miguel Rosendo, desmentiu que os matrimonios foran concertados e trasladaron nas súas declaracións a "normalidade" deste grupo, coñecido como dos miguelianos, e que "o da seita é cinematográfico". Así o trasladou a defensa de Miguel Rosendo, que explicou que esta parella, que na mañá deste xoves declarou ante a xuíza de instrución número 1 de Tui, é unha das que vivía na casa nai de Mougás e levan uns 10 anos de matrimonio.
Ademais, trátase dun varón e unha muller que estiveron "metidos no corazón" da Orde e, sempre segundo a versión da defensa, este xoves coas súas declaracións "deron moita normalidade" e transmitiron "que eran xente normal e o da seita é todo de película". "Desmentiron todo, era todo unha patraña", apostilou.
Segundo explicou, quen acusa de que os matrimonios "eran apañados" é unha muller que é "das poucas que di que sufriu abusos sexuais", e a parella apuntou que supostamente denunciou por "rancor" cara a Miguel Rosendo, ao que culpa de que o que era o seu noivo deixouna para facerse sacerdote e acabou casado con outra rapaza que formou parte da Orde.
A defensa tamén dixo que, sobre esta muller, o matrimonio mantivo que era unha persoa "conflitiva, con ansias de protagonismo, vaidades e envexas persoais". Así as cousas, concluíu que a parella "desmentiu todos os puntos sobre os que a acusación particular construíu isto".