Os veciños da Coruña que reciben o Iprem (unha renda de 537 euros ao mes) non pagarán por subministración de auga, depuración, lixo e saneamento, segundo informou o portavoz municipal, José Manuel Lage. A medida está incluída nas modificacións das ordenanzas fiscais, aprobadas na Xunta de Goberno Local, que entrarán en vigor o próximo ano "co fin de garantir ás persoas sen recursos o acceso aos servizos básicos", explicou o edil.
As modificacións establecen unha "cota cero" e bonificacións para as persoas con menos recursos que están en risco de exclusión social nos servizos de depuración, saneamento, subministración de auga potable e tamén na taxa de lixo. No caso das bonificacións, quen gañe 1,5 veces o IPREM (805 euros/mes), terá unha bonificación do 75% nestes servizos e taxas municipais.
En resposta a este anuncio, Marea Atlántica recordou ao grupo de goberno, o PSOE, que as rendas máis baixas non pagan servizos básicos desde "decembro de 2015". Nun comunicado, asegura que "non pagan taxa de auga, lixo e depuración desde decembro de 2015" e incide en que foi "unha das primeiras medidas fiscais do goberno de Marea Atlántica". "O que se fai nesta actualización é aumentar as bonificacións", aseguran desde esta formación tras a Xunta de Goberno local extraordinaria celebrada este martes, na que se abordou as ordenanzas fiscais.
