sábado. 23.11.2019 |
El tiempo
sábado. 23.11.2019
El tiempo

''Si algo puedo sacar de los líos en los que me metí es aprender''

''Agora mesmo estou nun momento estupendo, tanto a nivel anímico como persoal e sentimental''. Aos seus 28 anos, a vida volve sorrirlle a Borja Alonso, que loita para deixar atrás os turbios sucesos nos que se viu envolto e conquistar a estabilidade perdida. No amor xa a atopou xunto a unha moza viguesa e, no laboral, prepárase para bombeiro, para o que cambiou a pasarela polo ximnasio.

Pregunta: Volveu a Coia, creo que disposto a empezar unha vida nova.

Resposta: Cando vivía en Madrid sempre viña aquí, pero agora estou establecido definitivamente. Estou preparando as oposicións a bombeiro, a ver se saen xa en xullo. Hai que darlle caña porque son complicadas, sobre todo a parte física. Pero aí estou.

P: Requiren de moito adestramento.

R:
Si, adestro mañá e tarde. Paso horas no ximnasio e logo tamén fago piscina e taekwondo.

P: Con este deporte volve dalgún xeito ás súas orixes...

R:
Si. Deixeino cando marchei a Madrid, pero eu levaba no taekwondo desde os 4 anos. En 2001 fun campión de España e agora volvín adestrar en setembro --antes non puiden facelo pola lesión na perna--, e en decembro xa empecei a competir. Quedei terceiro no campionato galego.

Amizades perigosas
P: Á hora de facer balance, como lle cambiou a vida desde que obtivo título de Míster en 2005?

R:
Balance procuro non facer moito; quedo coas cousas boas. Tiven experiencias moi boas e outras moi malas, pero hai que recordar o positivo.

P: Protagonizou unha serie de sucesos do máis violentos. Que saca en claro deles?

R:
Se algo podo sacar é aprender, igual a non ser tan inxenuo e inocente. Ás veces un equivócase.

P: O seu erro foron as amizades perigosas?

R:
Si, foi de todo un pouco.

P: Supoño que celebra que todos os que quixeron atentar contra vostede se atopan en prisión...

R:
Si, aínda que a min o que me sacaron xa non mo van devolver.

Oposicións a bombeiro
P: Cre que a súa imaxe quedou danada por tanto suceso estraño?

R:
Home, non che vou dicir que non porque te estaría enganando. Pero os que me importan son os que están ao meu lado todos os días: a miña familia, a miña noiva e os meus amigos. O resto da xente fíase do que lle di a televisión ou do que le, e o certo é que me dá igual. Se tivera que ir explicándolle a todo o mundo a miña versión non acabaría nunca.

P: Chegaron a vinculalo co mundo das drogas. Molestoulle?

R:
No seu momento si porque acendías a televisión e estaban falando sempre do mesmo, pero logo deume igual porque os meus sempre me apoiaron.

P: Sofre secuelas por culpa dalgunha das agresións?

R:
Non, estou perfectamente. De feito estou preparando as oposicións a bombeiro e como non esteas ben fisicamente...

Traballo de futuro
P: Tras pasar polos programas e revistas do corazón, non cre que lle deron máis notoriedade polas polémicas que polo seu título?

R:
Sen dúbida. Hoxe pos o meu nome en Google e aparecen 50.000 entradas dos sucesos tráxicos e dúas de Míster España. Moitos chamábanme para dicirme que me querían axudar a lavar a imaxe, pero logo presentaban a entrevista con pistolas e leas, cortábana como querían e ao final parecía gilipollas.
 
P: Entendo que tamén houbo bos momentos, con cales quedaría?

R:
Coas viaxes que fixen. Eu antes non viaxara moito e grazas ao título coñecín o Caribe e moitas das cidades europeas. Só a Brasil fun unhas nove veces... (risas).

P: Malia que aspira a bombeiro, seguirá traballando como modelo?

R:
Non o aparquei, pero agora teño claro o que é o importante, e se me coincidise un desfile co traballo, primeiro vai ser o segundo. A moda está ben pero pasa de largo; é hora de centrarse nun traballo de futuro que me dea estabilidade. Xa non quero o de antes, andar de aquí para alá...

Ben acompañado
P: Ten moza nova...

R:
Si. Estou cunha moza e o certo é que moi ben; ela achégame moita estabilidade e tranquilidade. Estamos xuntos desde o meu aniversario, o 1 de outubro de 2009. Foi o meu regalo (risas). É de Vigo e estuda en Pontevedra; outro motivo para asentarme aquí.

P: A banda de guapo oficial de España, púxolle moitas mozas en bandexa?

R:
A min a banda duroume un día; regaleilla á señora da limpeza (risas). O que pasa é que aí nunca chegas a fiarte de que queren esas mozas, se coñecerte a ti ou o que representas como Míster. Coñecín moitas mozas, pero que mereceran a pena, cero.

P: Agora que está volcado coa vida sa e o deporte, segue algunha dieta?

R:
A dieta de comer todo o que poida! (risas). Con todo o deporte que fago pódome permitir comer todo o que quero. O meu corpo é súper agradecido para iso. Marisco da ría e sen problema.

A superficialidade da moda
P: Algún truco de beleza?

R:
Non, o certo é que nunca fun moi Míster nese sentido.

P: Nin usa cremas?

R:
Ah iso si, ves? Gústanme moito os aceites e as cremas. Aí son media muller.

P: Como cualificarías o mundo da moda?

R:
Eu creo que é superficial, polo que se te queres dedicar a iso tes que ir moi centrado. Ter as cousas claras e non deixarte influenciar por ninguén.

P: De todas as persoas que coñeceu, quen lle resultou máis interesante?

R:
Poucas, moi poucas (risas). No seu momento cría ter moitos amigos, pero á hora da verdade na memoria do teléfono debo de ter catro ou cinco, duns 200.

''Si algo puedo sacar de los líos en los que me metí es aprender''
Comentarios