O furacán Dean, que alcanzou xa a categoría 4 da escala Saffir-Simpson (a intensidade máxima é 5) está cada vez máis preto da Península de Iucatán e do Golfo de México, segundo informaba o Centro Nacional de Furacáns dos EE.UU, situado en Miami.
O ollo do furacán atópase a uns 1.290 quilómetros ao sudeste de Kingston (Xamaica), onde se espera que chegue o domingo e a 410 do Porto Rico, segundo varias publicacións dixitais mexicanas. De seguir a súa traxectoria inicial, podería chegar á Península de Iucatán a comezos da próxima semana.
Polo de agora, Dean, xa pasou polas illas de Santa Lucía e Martinica, onde deixou polo menos tres falecidos e numerosos destrozos. Naquel momento o furacán era de categoría 2 e desprazábase a 40 quilómetros por hora. Na actualidade, os seus ventos sobrepasan xa os 215.
Quintana Roo, en estado de emerxencia
Ante a alta probabilidade de que o furacán Dean, que xa está no océano Atlántico, chegue e impacte na península do Iucatán, a Secretaría de Gobernación (Segob) declarou en estado de emerxencia a oito municipios desa zona.
A declaración foi solicitada polo goberno de Quintana Roo para "contar cos recursos e atender gastos para satisfacer as necesidades prioritarias e inmediatas da poboación que puidera resultar damnificada polos efectos do fenómeno natural", segundo o xornal dixital mexicano Milenio.com.
Maila isto, as autoridades estatais xa poden dispoñer dos recursos do Fondo Revolvente do Fondo Nacional de Desastres Naturais (Fonden), para "atender ás necesidades alimenticias, de abrigo e de saúde da poboación" afectada polo furacán.
O furacán Dean gaña forza ao achegarse ao Golfo de México
