Os restos doutro corpo dun menor foron atopados na mañá de onte nas últimas escavacións que os arqueólogos da Deputación de Pontevedra están a facer no xacemento da Lanzada. Os ósos, que se atopan en mal estado de conservación, foron achados a uns 16 metros ao Leste da localización dos anteriores enterramentos de varios corpos de cativos, tal e como precisaron fontes da máxima institución pontevedresa. Tras unha primeira inspección crese que corresponderían a un menor de dous anos que, pola curvatura que presentan algúns dos ósos atopados, podería ter algún problema físico.
O achado realizouse nun emprazamento moi próximo a unhas estruturas que o equipo de arqueoloxía aínda está pendente de clasificar, para poder determinar a súa idade aproximada. Tras os últimos restos de cerámicas e da pulseira atopados en días pasados, este sería o achádego máis importante da última área de escavación. De feito, apenas quedan uns 16 metros cadrados de escavación para concluír esta fase no xacemento de A Lanzada.
A institución presidida por Carmela Silva confirma que "nuns días o persoal da escavación vai comezar a preparar os noiros e a conservación das estruturas atopadas antes de dar por rematada a intervención no xacemento".
Desde que os arqueólogos provinciais retomaran os traballos de escavación na Lanzada durante o pasado verán, atopáronse xa máis de 15.000 pezas de cerámica e outros achados.
Atopan un novo esqueleto dun neno na Lanzada
Os arqueólogos rematarán as escavacións a finais de mes