Viernes. 21.09.2018 |
El tiempo
Viernes. 21.09.2018
El tiempo

Cambados, epicentro do enoturismo europeo

Vendimia nunha adega de Cambados
Vendimia nunha adega de Cambados
Co nomeamento da vila como 'Cidade Europea do Viño 2017', Cambados acollerá máis de 80 actividades vinculadas ao viño

Coñecida como a 'capital do albariño das Rías Baixas' e de toda Galicia, Cambados xa ten una nova 'denominación' que engadir aos seus alcumes: 'Cidade Europea do Viño 2017'. O pasado 4 de novembro foi elixida pola Rede Europea de Cidades do Viño (Recevin) tras competir con outras vilas españolas de renome e con gran importancia no sector vitivinícola, como Ribera del Duero, Aranda de Duero, Villafranca del Penedés ou La Palma del Condado.

Cambados continúa así o legado da cidade italiana de Conegliano-Valdobbiadene, que obtivo a mención para o 2016 grazas a este concurso de carácter rotatorio entre os países que constitúen a rede.

E é que a vila cambadesa goza dunha gran tradición na elaboración do que Cunqueiro xa denominaba como 'o príncipe dourado', o viño albariño, popular ao redor do mundo, e mesmo que conta coa súa propia festa na cidade, declarada de Interese Turístico Nacional e Internacional.


Carmela Silva: "A presidenta da Deputación destacou os numerosos atractivos turísticos das Rías Baixas"

Fátima Abal: "A alcaldesa de Cambados valora o nomeamento como Cidade Europea do Viño como a oportunidade para dar a coñecer a vila internacionalmente"


Este recoñecemento converterá a Cambados en foco de case un centenar de actividades arredor do enoturismo no vindeiro ano, ademáis dunha oportunidade de promover non só a bebida espirituosa da terra de Cabanillas ou Valle Inclán, senón tamén de impulsar o seu turismo, cultura e gastronomía.

A alcaldesa de Cambados, Fátima Abal, destacou os principais atractivos do seu concello, remarcando a tradición vitivinícola que se soubo converter "nun reclamo turístico moi propio da vila". De feito, Abal mencionou á Festa do Viño Albariño, "que este ano celebrará o seu 65 aniversario", e as máis de cen actividades que se están a organizar en Cambados con motivo do nomeamento da vila como Cidade Europea do Viño.

Abal sinalou que "este nomeamento é unha oportunidade única para dar a coñecer internacionalmente a Cambados, ao Salnés e á provincia". Durante este 2017 "desenvolveremos máis de 80 actividades vinculadas ao viño e ao enoturismo", moitas delas ao abeiro do convenio de colaboración asinado coa Deputación de Pontevedra.

ATRACTIVO. A presidenta do organismo provincial, Carmela Silva, comentou que "cambiamos a forma de entender a promoción turística coa elección de campañas diferentes do que se fixo ata entón, rachando co binomio de praia e gastronomía, promocionando outras potencialidades do territorio ou achegándonos aos e ás visitantes a través de canles máis modernas e de vangarda".

O enoturismo é un dos eixos nos que descansará a nova campaña de promoción de Destino Rías Baixas. "29 municipios teñen cultivos e actividade vitivinícola baixo a denominación de orixe Rías Baixas e a nosa cultura do viño soubo manter a tradición á vez que innovar en novas liñas de negocio", sinalou Carmela Silva.

A presidenta da Deputación de Pontevedra sinalou que "temos un enorme potencial que nos sitúa e que nos consolida: dous albariños Rías Baixas clasificados entre os mellores do mundo nos premios Bacchus 2017 (Mar de Frades e A Troita), seis Estrelas Michelín ou tres dos principais iconos fotográficos de Galicia (Rapa das Bestas, Santa Trega e as Illas Cíes)".

A promoción da provincia de Pontevedra durante este ano 2017 estará encadrada baixo o lema 'Rías Baixas, moito por descubrir. Por moitas razóns'. A campaña inclúe actividades coma os Festivais Rías Baixas, unha referencia cultural e musical xa consolidada e cunha grande proxección nacional e internacional; os seis camiños que discorren pola provincia de Pontevedra cara Compostela, e o enoturismo, da man de Cambados. A presidenta da Deputación recalcou que "sería preciso unha rolda de prensa diaria para dar a coñecer todos os atractivos turísticos desta terra tocada polos deuses".

Cambados, epicentro do enoturismo europeo
Comentarios