O BNG iniciará unha campaña -tanto social como institucional- coa que pretende conseguir que Casa do Mar "sexa un punto de encontro para os mozos e mozas de Marín" y "evitar o derrubo". O Instituto Social de la Marina é o actual propietario do inmoble, polo que os nacionalistas marinenses pedirán unha reunión co director provincial deste organismo, "co obxectivo de darlle a coñecer o noso proxecto e saber, de primeira man, cales son exactamente as posibilidades de uso para o Concello".
No eido social, o BNG marinense abrirá un debate sobre as características que debería ter este centro cívico. Para recoller e contrastar as propostas, convocará unha asemblea aberta e "levaremos a cabo unha campaña informativa, sobre todo entre os máis mozos, co fin de recoller propostas e facerlles chegar as nosas". A campaña tamén incluirá actos reivindicativos co obxectivo de visibilizar na rúa esta campaña.
USO MUNICIPAL. Outra das accións do BNG con respecto a esta infraestrutura é que o uso sexa municipal. "O primeiro paso para conseguir este obxectivo está logrado", afirman os nacionalistas. "A proposta do BNG de que a Casa do Mar, unha vez estreado o Centro de Saúde, pase a ser de uso municipal, acadou o apoio de todos os grupos da Corporación, incluído o grupo de goberno que apostaba antes por crear un centro de día".
A moción presentada polo BNG, sen embargo, foi rexeitada no Pleno, co voto en contra do PP e a abstención dos demais, por non ter claro o destino do edificio.
Por outra parte, o Bloque asegura que o Goberno local está ante "unha clara falta de proxecto" para esta infraestrutura e acúsao de ser "incapaz de tomar decisións, ademais de que vai cambiando o seu programa electoral en función do que propoñamos os demais ou do calendario electoral".
GARDERÍA E OFICINAS. A proposta do BNG para este inmoble aposta por que sexa compatible co mantemento da gardería e incluso coas oficinas que o Instituto Social de la Marina ten no piso superior.
"Queremos que a Casa do Mar pase a ser un centro cívico destinado á mocidade, onde os mozos poidan desenvolver actividades de ocio e formación, e que permita a creación de asociacións xuvenís que favorezan a vida municipal e a convivencia entre eles e que, ao mesmo tempo, lles permita ter un lugar de encontro. Marín non pode continuar permitindo que os nosos mozos se desarraiguen do seu concello", destacan os nacionalistas.
El BNG de Marín quiere que la Casa do Mar sea "un punto de encontro"
Os nacionalistas iniciarán un debate social sobre o destino da infraestrutura e manterán reunións cos responsables do inmoble