Portela (Pontevedra, 1937) fala con prudencia de todos os temas e con máis aínda da ministra Pastor e de Calatrava. Este ano, entre outras cousas, prevé construír a torre de control do aeroporto de Sharm el-Sheikh, en Exipto.
P ¿Que tal se leva vostede coa ministra Ana Pastor?
R Moi ben. Non temos moita relación, pero coñecémonos desde hai moitísimos anos e mantemos, penso, unha relación cordial.
P Pois Fomento deulle desgustos: recortes no proxecto da Estación Intermodal da Coruña, paralización da Central de Valencia...
R En realidade, o proxecto da Coruña é un dos poucos que seguen en marcha de todos os que estaban por facerse e que se pararon, entre eles o de Valencia, onde se fixo unha estación provisional e se arranxan con iso.
P Pasoulle o contrario que a Santiago Calatrava en Valencia. A el supostamente dábanlle cheques en branco para as súas obras e a vostede paralízanllas.
R Si, pero el non lle cargaba as súas facturas a ningún ministerio; era á Comunidade Valenciana.
P ¿Que lle parece todo o que se lle reprocha a Calatrava?
R Home, non serei eu quen diga que é un modelo a seguir. Hai moitísimos arquitectos moito mellores. Para min el nunca foi un referente. Ata hai pouco era o mellor e hoxe é o peor. Nin unha cousa nin a outra.
P ¿Debuxoulle algunha vez un proxecto a un político nun pano de mesa? (Compromís acusou a Calatrava de facerllo a Camps).
R Xamais fixen nada así. Presentar un proxecto lévame moito tempo. Os panos de mesa só os uso nos bares para limpar a boca.
''Hoxe hai consenso en que o cemiterio de Fisterra debe pórse a funcionar''
P Tense referido en máis dunha ocasión á perda que supuxo para Pontevedra vivir de costas á ría.
R É que a min paréceme un tema fundamental. A cidade de Pontevedra non é outra cousa que un meandro entre o Lérez e o Gafos. Moitas cidades darían calquera cousa por ter un río e unha ría como temos nós. É unha pena desperdicialos.
P O modelo de cidade peonil, que tantas críticas recibía, agora faise con premios europeos. Foi sempre un firme defensor.
R Por suposto. E sígoo sendo. Para min é algo incuestionable. Trátase de poñer nunha balanza o coche e a persoa. Está claro que ten que pesar máis. O coche non deixa de ser un elemento máis ao servizo do ser humano, como tantos. O importante son os cidadáns.
P ¿Proxectos para 2013?
R Pois estamos traballando no aeroporto de Vigo e na lonxa de Ribeira, dous proxectos que gañei en concurso. E ademais empezaremos seguramente a torre de control do aeroporto de Sharm el-Sheikh, en Exipto.
P E aí está tamén a monografía que vai publicar con Loft.
R Que se atrasou precisamente porque quería pararme un pouco con ela e que saíse o mellor posible. Poñerase á venda nun mes ou cousa así.
P Leva o cemiterio de Fisterra na portada, a súa obra máis emblemática. ¿Desta tampouco lle preocupa o futuro?
R Son optimista por natureza. Creo que hoxe hai consenso en que debe pórse a funcionar. É certo que ten uns valores arquitectónicos e escultóricos aínda que non se estree, pero non fas unha obra só para que sexa bonita; ten que usarse.
