O conselleiro do Deportivo da Coruña, Germán Rodríguez Conchado, renunciou onte ao seu cargo, tras a decisión do club galego de non destituír o director do diario Depor Sport, que edita a entidade branquiazul, tal e como esixira o dirixente deportivista.
“Ante a falta de resposta interesada ao consello de administración, no día da data formalicei a miña renuncia á miña condición de membro do consello, desvinculándome da sociedade, con expresa reserva, en todo caso, do exercicio das accións que correspondan en defensa da miña honra”, sinalou o polémico avogado a través dun comunicado. A renuncia do ata o de agora conselleiro, que tamén exerce como asesor xurídico do club, prodúcese como consecuencia do artigo publicado na súa edición do mércores polo diario Depor Sport, no que a xuízo de Rodríguez Conchado se lle insulta “gravemente” con “descualificacións de carácter persoal absolutamente inadmisibles”, entre elas, “gorila macho, un alcume que, ao parecer, é empregado por empregados do club para referirse ao conselleiro.
Dada a circunstancia de que o citado periódico, tal e como explica Rodríguez Conchado na súa nota, está editado por unha sociedade que pertence “na súa totalidade” ao Deportivo, o xa ex conselleiro solicitou ao consello o “cesamento fulminante do autor de devandito artigo”, o director do diario Xaime Calviño. Malia os rumores de destitución, Calviño seguía onte como director do xornal e mesmo xustificou un nha cadea de radio o seu artigo polas “filtracións que Conchado fai a outros medios competidores de informacións do club”, algo ao parecer habitual no ex conselleiro.
