Dani vs Dani, este domingo, no Pazo da Cultura

O Pazo da Cultura acolle este domingo o espectáculo cómico a cargo dos coñecidos monologuistas televisivos Dani Martínez (Tonterías las justas) e Dani Rovira (Paramount Comedy). Dani vs Dani forma parte da programación da Concellaría de Cultura do último trimestre do ano. Será este domingo, 21 de novembro, ás 21.30 horas.

O monólogo "Dani vs Dani" modificou a data da súa presentación na cidade de Pontevedra dado que o cómico e imitador Dani Martínez se viu obrigado a cancelar a súa actuación prevista para este vernes día 19 e aplazala para dous días máis tarde: o domingo 21 ás 21 h.

O motivo que lle obrigou a mudar a data do espectáculo en Pontevedra non é outro máis que o de atender aos seus compromisos co grupo PRISA e coa empresa Sogecable para as que traballa no programa diario "Tonterías las Justas" de Cuatro TV, que requiriu a súa presenza o mesmo día 19 para presentar a gala dos Premios Ondas no Teatro Liceo de Barcelona.

Na actuación do domingo, o televisivo Dani Martínez vén acompañado doutro dos grandes xenios dos monólogos de hoxe en día: "o inmortal da risa" Dani Rovira, que actualmente forma parte do elenco do Canal Paramount Comedy Channel, no seu programa "Nuevos Cómicos" e na xira de teatros por España.

Os dous artistas veñen dispostos a batirse nun dolo de humor para que o público non sexa capaz de parar de rir. O seu humor caracterízase como veloz, crítico, intelixente, ácido, imprevisible e, ás veces, surrealista, pero o que sobre todo cómpre destacar é a súa impresionante capacidade de improvisación. "Dani vs Dani" será o espectáculo definitivo. Dous imbéciles e un obxectivo: a risa.

Os prezos adiantados son de 14 ou 12 euros, en función da zona. E o mesmo día do espectáculo pódense obter na billeteira do Pazo da Cultura entre os 18 e os 15 euros, en función da zona.

Comentarios