'Casto Sampedro, a Sociedade Arqueolóxica e a memoria de Pontevedra' é o título da conferencia que ofreciu onte o director do Museo de Pontevedra, José Carlos Valle Pérez, con motivo da inauguración do Memorial Filgueira Valverde, que este ano celebra a súa décima edición.
Centrado na figura de 'Casto Sampedro Folgar (1848-1937) e o seu tempo', dado que en abril do vindeiro ano se cumprirá o 75 aniversario do seu falecemento, o memorial ofrecerá ao longo da semana outras tres ponencias sobre a vida, obra e legado de quen foi o fundador da Sociedade Arqueolóxica de Pontevedra, entre outras grandes aportacións a cultura galega.
Tras a participación de Carlos Valle, este martes é o turno do profesor da Universidade de Santiago de Compostela José Armas Castro, quen falará sobre 'A vida cotiá na Pontevedra Medieval á luz dos fondos documentais de Casto Sampedro'.
Mañá, o título escollido polo secretario do Museo, José Fuentes Alende, é sobre 'Casto Sampedro Folgar e a Antropoloxía cultural de Galicia'.
A conferencia de clausura, o xoves, será a cargo do musicólogo e profesor do IES 1 de marzo, Xavier Groba González, que versará sobre o relativo 'A música na vida e no legado documental de Sampedro'. Ao igual que a ponencia inaugural, as tres propostas levaránse a cabo no salón de actos do Sexto Edificio do Museo de Pontevedra ás 20.00 horas.
