A cerimonia de clausura que pechou a novena edición do Festival Internacional de Curtametraxes de Bueu encheu por completo o Centro Social do Mar. Unha alfombra vermella de flores coa ánfora San Martiño (o logo do certame) deu a benvida a convidados e público na entrada do Centro Social do Mar. Membros da Asociación Cultural Alfombras do Corpus de Bueu prepararon o tapiz floral, ante o que desfilaron actores e realizadores galegos e estranxeiros, ademais de autoridades como o alcalde de Bueu, Félix Juncal; a presidenta da Deputación de Pontevedra, Carmela Silva, ou o secretario xeral de Cultura da Xunta de Galicia, Anxo Lorenzo, en representación das tres administracións que apoian o FicBueu. A gala deu comezo ás 21.30 horas e o encargado de conducir o acto foi o actor César Aldea. A cita estivo amenizado pola música en directo do pianista Severiano Casalderrey.-
PREMIADOS. Os filmes gañador do certame foi o croata 'Piknik', de Jure Pavlovic, que recibiu a Ánfora de Ouro, dotada con 2.500 euros. O gañador da Ánfora de Prata, que ascende a 1.000 euros, foi a cinta austríaca 'Esel', de Rafael Haider. O Premio á Mellor Curtametraxe Galega foi para 'Eco', do director Xacio Baño.
Este galardón, patrocinado pola Fundación Novas, está fixado en 500 euros. O Premio do Público, dotado con 750 euros, foi para 'Madam Black', do director neocalendonio Ivan Barge.
Os diplomas das restantes categorías artísticas e técnicas foron para, no caso da mellor dirección, Maimouna Doucouré por 'Maman-s'. O galardón para o mellor guionista foi para Tim Ellrich e Dominik Huber por 'Die Badewanne'. O premio á mellor actriz foi para Ingrid Burkhard por 'Esel' e o do mellor actor foi compartido para Simon Jaritz, Rainer Wöss e Stefan Pohl por 'Die Badewanne'.
A Ánfora de Ouro foi para a curta Piknik, de Jure Pavlovic, mentres que a de prata foi para o filme Esel, de Rafael Haider
Lucie Ternisien e Maxence Lemonnier foron galardoados na categoría de mellor fotografía por 'Fils du loup'. No tocante á mellor dirección artística, Nina Gantz, Aoife Coigley e Paulina Rzeszowska gañaron esta categoría pola curta 'Edmond'.
O premio á mellor montaxe foi para Felix Rehm por 'Fils du loup', e o de mellor son foi para Rob Turner por 'Edmond'. No caso da mellor música, Raf Keunen gañou esta categoría polo filme 'Copain'. E finalmente, o galardón ao mellor vestiario foi para Vinyet Escobar e Laia Pajares por 'El adiós', e o de mellor maquillaxe e peitado para Sandrine Legrand por 'Réplique'.
Para este domingo está prevista a proxección dos traballos máis destacados enviados por centros educativos de Galicia, entre os que se decidirá un único premio dotado con 250 euros. Na sesión presentarase ademais a curta resultante do obradoiro ao que asistiron sete mozos durante os últimos días. Trátase dunha actividade solidaria coa promoción do cinema en aldeas peruanas, xa que a contía que voluntariamente queiran aboar as persoas asistentes se destinará aos proxectos da plataforma cultural La Combi - Arte Rodante. Talleres audiovisuais para mozos, proxeccións ao aire libre ou festivais pola liberdade de expresión atópanse entre as accións que organizan, habitualmente en zonas desfavorecidas ou en comunidades afastadas.
