O colexio Sagrado Corazón de Praceres acollerá entre os días 5 e 8 de outubro o encontro europeo de directores de centros educativos da súa rede, que se estende por todo o mundo e que case coincidirá co centenario do centro educativo, previsto para 2018.
Asistirán 75 representantes de todo o continente (España, Austria, Bélxica, Inglaterra, Francia, Irlanda, Polonia, Italia, Malta e Escocia) e outros tres convidados procedentes de EE UU e Exipto. Ademais do seu traballo específico, aproveitarán para coñecer a cidade, o contorno das Rías Baixas e Santiago de Compostela.
O colexio pontevedrés está situado en Lourizán desde hai case un século. Desde 1918, tras a cesión do edificio por parte do ministro Montero Ríos, o equipo de profesores leva a cabo o seu labor docente nun centro que actualmente ten preto de 700 alumnos e que está centrado na innovación educativa, segundo explican os seus responsables nun comunicado.
Co gallo da celebración do centenario ofertaranse visitas guiadas ao centro para que o público en xeral poida coñecer este edificio singular relacionado tamén co Pazo de Lourizán.
O anterior encontro tivo lugar en Dublín (Irlanda) en 2013 e este ano é a quenda de España, polo que o equipo directivo do centro está a organizar as actividades e o traballo destas catro intensas xornadas, nas que tamén contará coa presenza do xefe territorial de Educación, César Pérez Ares.
O Sagrado Corazón de Praceres reunirá a 75 directores europeos
O colexio de Lourizán acolle esta semana un encontro con docentes de dez países do continente e convidados de Exipto e EE UU
