Miércoles. 19.09.2018 |
El tiempo
Miércoles. 19.09.2018
El tiempo

Ponte Caldelas transmite a Villares "a soidade dos alcaldes" ante as lapas

Reunión celebrada na Casa Consistorial pontecaldelana
Reunión celebrada na Casa Consistorial pontecaldelana
Andrés Díaz transmitiulle ao líder de En Marea os problemas padecidos pola vaga de incendios

O alcalde de Ponte Caldelas, Andrés Díaz, recibiu o xoves ao voceiro de En Marea, Luís Villares, para analizar a situación producida durante e despois dos incendios forestais do pasado día 15. A visita centrouse fundamentalmente na xestión da emerxencia e "noo absoluto fracaso do Goberno galego" neste eido.

Villares, que chegou acompañado do deputado Marcos Cal, do representante local Roi Márquez e unha representación dos colectivos veciñais e de xestión do monte en Ponte Caldelas, estivo no Concello durante preto de dúas horas que serviron para analizar polo miúdo o sucedido neste Concello, onde arderon unhas 2.900 hectáreas, un tercio da superficie municipal. Díaz explicou as súas queixas pola "descoordinación e abandono por parte dos servizos de extinción da Xunta de Galicia", que "non se presentaron ata pasadas as 3 da madrugada", pola tardanza en declarar a alerta 2 e mesmo pola contumacia da Consellería de Medio Rural "en negar que Ponte Caldelas tivera padecido o lume cunha virulencia equivalente á dos concellos máis afectados". "Chegaron a dicir", explicou Díaz, "que aquí non houbo incendios".

O rexedor e Villares falaron das súas dúbidas sobre o verdadeiro alcance das axudas oficiais anunciadas pola Xunta, motivo polo que o Concello está a recadar fondos cunha conta solidaria e a realizar iniciativas como o reparto de forraxe. O mapa de Emerxencias foi outra das cuestións abordadas.

O venres celebrarase a última xornada da Operación Mulching, na que se repartirán sete toneladas de palla polo monte queimado

Díaz expresou a batalla que Ponte Caldelas está a liderar dende hai tempo para a modificación do mapa de emerxencias na provincia de Pontevedra, cuxa peor zona de sombra está ao redor dos concellos de Ponte Caldelas, Cerdedo-Cotobade, A Lama e Campo Lameiro. Luís Villares comprometeuse a recoller todas as impresións e suxestións de Ponte Caldelas para telas moi en conta de cara a futuras iniciativas parlamentarias.

OPERACIÓN MULCHING. Por outra banda, a Operación Mulching vivirá o venres unha última xornada. Quedan por repartir un total de sete toneladas de palla das 30 adquiridas polo Concello. O traballo centrarase nas proximidades dos acuíferos de Chaín, Regodobargo, Barbudo e Parada, fundamentalmente. Son unhas 20 pacas que xa están sobre o terreo e que non foi posible completar durante a xornada do pasado sábado.

Os traballos darán comezo ás 9.30 horas.

A Corporación de Soutomaior mostrou o xoves o seu apoio unánime a unha iniciativa presentada polo BNG, para abordar diferentes medidas en defensa dos veciños afectados polos incendios forestais, que arrasaron unhas 900 hectáreas de monte a mediados de outubro.

Nunha sesión extraordinaria celebrada na mañá do xoves, acordouse, por exemplo, a elaboración dun informe oficial de danos, a creación dunha mesa de traballo coas comunidades de montes e confrarías para tramitar as axudas, a elaboración de formularios sinxelos para que os veciños poidan solicitalas ou o traballo en coordinación con especialistas e outras administracións para iniciar os labores de recuperación do monte. A primeira xuntanza desta mesa de traballo será o vindeiro luns ás 13.00 horas. Na moción tamén se aprobaron outras actuacións como facer cumprir as ordenanzas e a lei no relativo ás distancias de seguridade e limpeza de terreos.

Ponte Caldelas transmite a Villares "a soidade dos alcaldes" ante...
Comentarios