martes. 25.01.2022 |
El tiempo
martes. 25.01.2022
El tiempo

As rúas énchense de cor para celebrar o XLII Día da Muiñeira en Pontevedra

Os actos centrais concentráronse na avenida de Montero Ríos, onde os diferentes grupos bailaron durante máis dunha hora (Foto: Javier Cervera-Mercadillo)
Os actos centrais concentráronse na avenida de Montero Ríos, onde os diferentes grupos bailaron durante máis dunha hora (Foto: Javier Cervera-Mercadillo)

PONTEVEDRA. "Estase recuperando a tradición, e os colexios teñen un papel importante a este respecto". Pepe Cortizo, director da Asociación Duos Pontes, valoraba positivamente a participación de agrupacións no XLII Día da Muiñeira, que onte fixo súas as rúas de Pontevedra.

Foron preto de vinte as formacións que tomaron parte nesta cita, un referente no ámbito do baile e a música galegas na provincia.

"Dende os últimos cinco ou seis anos mantense o número de participantes", sinalou Pepe Cortizo nun receso da celebración, que tivo o seu acto central na avenida de Montero Ríos. "Son moitas as vantaxes do baile galego, xa que ademais de contribuír a conservar certos valores culturais, é un xeito de facer exercicio físico", lembrou.

A festa comezou cara o mediodía, cando a zona vella acolleu alboradas a cargo da escola de gaitas Duos Pontes. Xa pola tarde, os grupos foron concentrándose na Praza do Teucro para ir desfilando cara a avenida de Montero Ríos, onde tivo lugar a celebración propiamente dita.

O bo tempo contribuíu a que se congregase un público importante en número, que non dubidou, nalgúns casos, en botarse a bailar ao ritmo das gaitas.

Este ano o grupo convidado foi a Asociación Folclórico Cultural Meiramar-Axóuxeres de Moaña, que interpretou a Jota de Santa Xuliana, a Muiñeira de Silvela, a Mazurca do Entroido Tradicional de Moaña e a Jote e Muiñeira de Padreiro.

Por parte da cidade de Pontevedra participaron as asociacións Duos Pontes, Celme, Os Trazantes, Veira do Río e os colexios Los Sauces, Álvarez Limeses e a escola infantil Bamby. Por parte doutros concellos da comarca, estiveron onte bailando no Día da Muiñeira en Pontevedra as formacións Os Chaneiros, Alandra, Pais de San Roque, Recordos da nosa terra, Soavela, Soalleira, Abiñadoira, O Trevo, Xamaraina, Miúdos e Os Penediños.

A "festa de cor", como a denominou Cortizo, rematou co Pasodobre de Sárdoma.

A celebración do XLII Día da Muiñeira remata hoxe coa tradicional ‘Palillada na rúa’, que terá lugar na Praza da Peregrina a partir das 11.30 horas. Participarán as palilleiras do obradoiro de encaixe de boliños que organiza a asociación Duos Pontes durante todo o ano coa profesora Esperanza Marín Magdalena.

A celebración rematará hoxe cunha palillada de encaixe de bolillos na Praza da Peregrina, que terá lugar a partir das 11.30 horas.

As rúas énchense de cor para celebrar o XLII Día da Muiñeira en...
Comentarios