Danza no medio da exposición ‘Corpo’ do Pazo da Cultura, unha visita ao Sexto Edificio cos ollos vendados ou un percorrido polo CITA á noite foron algunhas das actividades a través das que Pontevedra festexou, na noite do pasado sábado e hoxe durante toda a xornada, o Día Internacional dos Museos.
A celebración correu a conta das dúas institucións que xestionan os espazos museísticos máis importantes da cidade: o Concello e a Deputación. Por unha banda, o Concello organizou unha programación ubicada no Centro de Interpretación das Torres Arcebispais (CITA) e no Pazo da Cultura. A Deputación fixo o propio no Sexto Edificio do Museo Provincial. As dúas institucións coincidiron en comezar a celebración a véspera e en que a gran maioría das propostas precisasen de inscrición previa.
Ademais de toda unha serie de actividades previas na rúa e outras dirixidas especificamente a centros escolares, asociacións veciñais, culturais e outros colectivos, o CITA comezou a celebrar o Día dos Museos o sábado á noite (a partir das dez), a través dunha serie de visitas guiadas nocturnas ás Torres Arcebispais, a muralla medieval e o espazo arqueolóxico de Santa María, segundo informou o Concello.
Xa hoxe celebrouse unha xornada de portas abertas. Ademais, entre as sete e as oito da tarde estaba prevista unha actuación de Maldita Danza, un grupo formado por ex compoñentes do Centro Coreográfico Galego que presentaron no CITA a súa montaxe ‘Pasen e vexan’.
‘O corpo’
Aproveitando que na sala de exposicións do Pazo da Cultura se pode ver a mostra colectiva ‘O corpo’, o Concello convidou ao mesmo grupo a facer hoxe á mañá dous pases, estos si abertos ao público sen necesidade de inscrición previa, de coreografías inspiradas no corpo humano.
A Deputación pola súa banda comezou a celebrar o 18 de maio mantendo abertos tando o Edificio Sarmiento como o Sexto Edificio, o sábado, ata as 00.00 horas.
Castelao centrou tanto o espectáculo teatral (aberto ao público) que os alumnos da Escola Superior de Arte Dramática de Galicia ofreceron o sábado á tardiña como a visita dramatizada ‘Unha i-alma no Museo’ que se realizou á noite. Para o propio Día Internacional dos Museos, a Deputación reservou a actividade familiar ‘A arte dos sentidos’, na que se pretendía achegarse ao Sexto Edificio e ás súa obras de arte dende os distintos sentidos. «Trátase de promover a participación activa do público achegándose ao que se denomina ‘arte de acción’ máis que a unha visita guiada tradicional», explicaba a Deputación.
Galardón: Mención especial para o Muncyt
O Museo Nacional de Ciencia e Tecnoloxía (Muncyt) da Coruña vén de recibir unha mención especial no Certame ao mellor Museo Europeo 2014. O European Museum Forum recoñeceu ao Muncyt «pola súa capacidade para comunicar conceptos científicos e técnicos, así como polo seu compromiso e responsabilidade social».