A solidariedade pode manifestarse de moitas formas e ten a facultade de unir campos tan distintos como os da cultura e da investigación, que confluirán hoxe na segunda edición da Festa da investigación en pro da Fundación de Medicina Xenómica de Galicia, que dirixe o científico Ángel Carracedo.
Na gala, que terá lugar no centro social de Lusquiños (Tomeza) a partir das 19.30 horas, actuará o grupo de pandereiteiras As estreliñas de Tomeza e haberá un recital poético no que participarán varios rapaces e rapazas.
A asistencia á gala solidaria que terá lugar no local social de Lusquiños a partir das 19.30 horas é totalmente gratuita
A escritora Loli Beloso, que promove o festival, sinala que este tamén ten como obxectivo honrar a memoria do intelectual galeguista, artista, editor e empresario Isaac Díaz Pardo e da súa dona, Carmen Arias, que era coñecida como Mimina, "porque me impactou a súa obra humana. Os dous dedicaron a súa vida aos demais e a Galicia. Quero que o seu labor humano continúe", explica. Ademais, recorda que os beneficios íntegros da venda dos seus libros van destinados á investigación do cancro. "Comecei esta loita co meu primeiro libro sobre Isaac Díaz Pardo, titulado 'Isaac Díaz Pardo para as nenas e nenos galegos'", puntualiza.
Loli Beloso presentará na gala a súa primeira colección de xoias solidarias 'Veleiros de bos sentimentos de Isaac Díaz Pardo e Carmen Arias'. Explica que se chama así "porque a materia coa que están feitas estas xoias son uns anacos de pratos que me romperon nun viaxe de regreso de Arxentina. Vin neles uns veleiros que están feitos con porcelana da fábrica da Magdalena que Díaz Pardo fundou cos nosos exiliados no ano 1955, na súa primeira etapa. Están decorados a man".
Esta primeira colección foi moi ben recibida o pasado 23 de agosto na escola de cerámica número 1 'Bulnes 40 de Buenos Aires', fundada polo ceramista Fernando Harranz. "Cando Díaz Pardo viaxou por primeira vez a Arxentina para expoñer as súas cerámicas, Haranz foino visitar e fixéronse grandes amigos. Díaz Pardo perfeccionouse con este prestixoso ceramista", indica Loli Beloso.
Ademais das xoias, a escritora presentou en Arxentina un bolso que creou con liño antigo sementado pola súa avoa e que ten adornos de encaixe de Camariñas e incrustacións de porcelana da fábrica da Magdalena.
Estas primeiras xoias non sairán á venda porque Beloso quere telas de recordo. "Teño un proxecto cultural moi fermoso e imos facer máis que sairán á venda de cara ao Nadal. Trátase dunha gargantilla, un colgante, pendentes, un anel, unha pulseira e outro colgante que se presenta por primeira vez e chamado 'Amor de Díaz Pardo e Mimina'". Ao mesmo tempo destaca a colaboración dos xoieiros David Pérez, Óscar Castiñeiro e Bogoña Llácer Moreno, que crearon as pezas.
Ademais, Loli Beloso ten tres libros pendentes de publicar, dous de poemarios -un deles moi íntimo, que quere sacar a primeiros de 2018- e outro para nenos. "Teño outro libro que se vai poder adaptar a unha pequena obra de teatro e que me fai moita ilusión. Vai ser moi didáctico", asegura.
Polo de agora Beloso leva doado á Fundación de Medicina Xenómica entre 8.000 e 9.000 euros coa venda das súas publicacións. "Tamén houbo achegas de empresarios e persoas particulares que me apoiaron; algúns deles van asistir á gala, entre eles os donos de Cerámica da Ulla, Mario e Ana, que o ano pasado impulsaron a iniciativa Compromiso coa ciencia de axuda á investigación da Fundación de Medicina Xenómica. O empresario Magín Alfredo Froiz tamén está moi implicado nesta iniciativa solidaria".
Ademais, a escritora anuncia que ten previsto desenvolver un proxecto no que contará coa axuda do xerente da sala de festas La Luna, Luis López Basalo. "Vaime deixar o local para organizar unha macrofesta para a xuventude. Será de cara ao inverno e participará a orquestra El Combo Dominicano, que actuará de xeito altruísta", precisa a escritora.
