A veciñanza de Xustáns, en Ponte Caldelas, celebrou este domingo a festa da convivencia entre os catro barrios da parroquia: Sobreiro, Baltar, Aluncía e Chan do Casal. A tradicional procesión de San Roque percorreu os catro lugares cun itinerario que superou os cinco quilómetros e as tres horas de duración.
A comitiva saíu da igrexa de San Martiño de Xustáns ás 16.00 horas e regresou ás 19.00, despois de percorrer camiños municipais, un treito da estrada provincial e corredoiras empedradas, subindo e baixando costas e afrontando un esforzo físico notable co mellor dos ánimos. A andaina conta con participates de todas as idades e nas obrigadas paradas para repoñer forzas, son os propios veciños e mesmo o bar de Xustáns, quenes aportan as bebidas. O esforzo chega a ser tal que algunhas persoas acoden á festa con roupa deportiva.
A procesión, que foi a máis concorrida dos últimos anos, contou coa presencia do alcalde, Andrés Díaz, en representación da totalidade da Corporación local, e foi sumando veciños a medida que ía transcorrendo polos distintos lugares. A recuperación da asistencia de tempos atrás foi outro motivo máis de ledicia colectiva.
Esta cita celébrase sempre o terceiro domingo de setembro e tamén é coñecida como a procesión dos nenos, pois a súa presencia faise notar, tanto a pé como en bicicleta, gozando ao máximo dunha tarde de troula.
A marcha transcorre con música durante o paso polos pobos. Desta volta a animación correspondeu ao grupo de gaitas Os Coribantes. O ambiente é sempre distendido e os saúdos coas persoas maiores que quedan nas súas casas para ver pasar a comitiva e saudar aos participantes forman un dos rituais máis repetidos. A veciñanza de cada lugar adorna os cruceiros e os fitos relixiosos do camiño con alfombras florais e guirnaldas. Ao remate, a comisión organizadora reúnese para determinar o pobo gañador, en recoñecemento ao cruceiro máis fermoso.
Os máis vellos do lugar explican que se celebra dende moitos anos atrás, aínda que ninguén sabe dicir cantos.
Na parroquia de Xustáns non existe a confrontación
Os veciños dos catro barrios celebraron a tradicional procesión de San Roque, coa que simbolizan a súa boa convivencia e fraternidade