Volve o Enterro da Sardiña de Marín, pero non o fará como Festa de Interese Turístico de Galicia, tal e como se pretendía. Os prazos establecidos para realizar os trámites administrativos necesarios, que se atopan pendentes da aprobación definitiva por parte do Consello da Xunta, impedirán que este evento, o máis importante do Entroido marinense, consiga o seu obxectivo para a edición deste ano, que terá lugar o 22 de febreiro, coincidindo co Mércores de Cinza.
Pero no Ateneo Santa Cecilia este feito non é un motivo para perder a ilusión. Para conmemorar o retorno da festa ás rúas da localidade despois de dous anos sen celebrarse -en 2021 por motivo da pandemia e en 2022 a causa do naufraxio do buque Villa de Pitanxo, que días antes se cobrara a vida de 21 dos 24 mariñeiros a bordo- a entidade decidiu convocar un concurso para elixir o que será o cartaz anunciador desta esperada edición.
"Poñendo en marcha esta iniciativa o que pretendemos é achegar o evento á cidadanía, darlles máis protagonismo e que participen de forma activa nesta festa, que a sintan como propia porque o de Marín é un Enterro único", explicou o presidente do Ateneo, Lois Dopazo, quen transmitiu que este é un punto no que a entidade leva un tempo interesada en traballar.
Segundo indicou Dopazo, a falta de máis dun mes, os preparativos para a celebración do Enterro da Sardiña "xa están moi avanzados, despois de tanto tempo hai moitas ganas".
BASES
No certame poderá participar toda persoa que teña máis de 18 anos, coa posibilidade de entregar un máximo de unha obra por autor. Esta, de técnica libre, deberá ser orixinal e presentarse en formato DIN A3, ademais de incluir o título Enterro da Sardiña 2023 no seu deseño. Ademais deberá ir acompañado dunha breve explicación do traballo.
Haberá un único premio cunha dotación económica de 300 euros. A obra gañadora, que se dará a coñecer o luns 30 de xaneiro, será elixida por un xurado que estará conformado por dous membros da directiva do Ateneo Santa Cecilia, un representante do Concello e unha persoa licenciada en Belas Artes.
Para a súa presentación, os traballos deberán entregarse antes do 28 de xaneiro, data límite do prazo, no local do Ateneo, ubicado na rúa do Forno, ou a través do correo electrónico [email protected]. Os cartaces presentaranse sen sinatura e identificados baixo un lema que aparecerá na parte traseira, deberán acompañarse dun sobre pechado en cuxo exterior figurará o lema e no seu interior os seguintes datos: nome, apelidos, DNI, dirección, teléfono e correo electrónico.
