Logo de tres intensos días de música o SonRías Baixas pechou na madrugada do domingo a súa décimo sexta edición e fíxoo colgando o letreiro de "completo". O festival congregou a pasada fin de semana en Bueu a 22.000 persoas, que gozaron de tres días e tres noites de música, gastronomía e praia. O festival acadou así un novo récord histórico, superando en preto de 5.000 persoas a cifra do ano 2016, a máis multitudinaria ata o momento.
Para coñecer a repercusión que o festival ten a nivel local, un equipo da USC realizou estes días centos de enquisas entre as persoas asistentes ao SonRías Baixas co obxectivo de calcular con precisión o efecto multiplicador que o investimento realizado supón para Bueu e para a súa contorna. Unha vez analizados todos os datos, a organización dará a coñecer os resultados.
CONCERTOS. O pistoletazo de saída ao SonRías 2018 dérono, o xoves, os valencianos Assekes, que foron recibindo coa súa mestura de ska, rumba e rock alternativo as máis de 4.600 persoas que se congregaron no Recinto da Estacada de Bueu para botar co ska-punk dos italianos Talco. Pechou a noite o rap e a electrónica en euskera de Revolta Permanent.
O venres, a organización colgou o cartel de "completo" na zona de acampada, onde se deron cita 3.500 persoas. A principal voz do underground suramericano do momento, Sara Hebe, deixou paso á peculiar fusión de folclore latinoamericano con ritmos xamaicanos e actitude punk dos Che Sudaka. Os valencianos La Raíz protagonizaron un dos momentos máis intensos do festival, facendo vibrar a preto de 7.000 persoas no seu último concerto en Galicia. Desakato e Terbutalina pecharon a noite do venres.
Para despedir o SonRías Baixas, o sábado 7.000 persoas viviron unha enerxética noite de concertos: temas de autor urbanos e mestizos de Muerdo, cancións libertarias dos Gatillazo, entusiasmo e alegría de Muchachito, o potente directo dos rockeiros euskeras Berri Txarrak e o peche cos galegos The Skarnivals.
Éxito da Casa SonRías