Cor, arte floral, coordinación e letras orixinais volveron a soar en Marín na celebración dos Maios que significa a saída da pandemia. O evento, organizado polo Ateneo Santa Cecilia destacou pola ampla cantidade de participantes, tanto no concurso de maios como no de embarcacións e tamén pola asistencia de público que seguiu con atención as actuaciós dos nenos e nenas de todas as formacións.
Premios
En canto aos premios, o Maio Landeiras foi o que acadou a mellor nota pola súa construción e mereceu a segunda mención entre as coroas. Nesta categoría foron os de San Xulián co maio promovido por Os da Caña os que quedaron primeiros.
Casualmente, o maio de San Xulián fora a segunda mellor construción, segunda mellor letra e segunda mellor interpretación. A letra máis premiada foi do orixinal Maio da Bruxa, do CPR San Narciso, que levou tamén o premio á mellor interpretación.
En canto ás embarcación, houbo premio tamén para a de San Narciso por ser a mellor construída, para a letra da Xiana, (CEP Sequelo) e para a interpetación de San Xián dos Ancourados, tamén da Asociación Os da Caña.
Na cita houbo mencións para case todos os participantes, como o barco de Monte de Mogor, segundo premiado pola súa construción, ou o maio desta mesma barriada, que foi merecedor do terceiro posto en canto á letra do maio principal se refire.
A organización destacou a grande calidade das composicións presentadas e agradeceu o esforzo de cativas e cativos que fixo deste retorno unha gran festa.