Case un ano despois da celebración da asemblea na que a Mancomunidade de Montes do Morrazo decidiu integrarse na plataforma Eólicos no Morrazo NON, esta entidade volveu reunirse este sábado para renovar a súa posición contraria á instalación das poligonais de Macro-Eólicos nos montes da comarca. Dous representantes de cada unha das doce CCMM que conforman a entidade participaron na xuntanza, celebrada na sede da Comunidade de Moaña.
Este rexeitamento súmase ao xa realizado nos últimos meses polos plenos municipais dos Concellos de Cangas, Moaña, Bueu e Vilaboa. Tal e como informou o presidente da Mancomunidade, Xosé Ramón Millán, esta "comprométese a participar na información e sensibilización aos colectivos e á veciñanza", co fin de aumentar o número de individuos contrarios ao proxecto dos parques eólicos.
No marco deste rexeitamento unánime, Millán tamén manifestou a intención de todos os membros da entidade de "proceder a todas as mobilizacións necesarias producirse calquera intento de instalación das poligonais de Macro-Eólicos".
A secretaria do colectivo, Mari Carmen Rosendo, explicou que esta posición está motivada pola superficie que sería ocupada polos parques eólicos, xa que "suporía a cuarta parte da comarca". Esta sinalou que dita instalación conlevaría "a depreciación do valor económico de fincas e vivendas ata nun 30%, así como o éxodo da poboación".
Pola súa parte, o tesoureiro da Mancomunidade, Ignacio Piñeiro, determinou que "produciríanse danos irreversibles ao patrimonio culturas e ao noso medio ambiente".