A Mancomunidade do Morrazo reduciu este un ano un 3% os residuos enviados a Sogama, unha cifra que supón un incremento da reciclaxe da comarca e que supera a media galega. Así o constaron Félix Juncal, alcalde de Bueu e o presidente actual da Mancomunidade de Concellos do Morrazo, e Javier Domínguez Lino, presidente da Sociedade Galega do Medio Ambiente (Sogama), nunha visita á planta de residuos da Mancomunidade, situada no polígono de Castiñeiras.
Durante o encontro, tamén se anunciou que de cara a finais de xuño, e despois dos trámites administrativos correspondentes, ambas entidades asinarán un convenio que permitirá apoiar dende Sogama a xestión da planta, polo que se estipula que lle abonará á Mancomunidade a cantidade de 4,75 euros, IVE excluído, por cada tonelada de lixo entregada.
Domínguez Lino destacou que "por fin pecharemos o convenio que desexabamos dende hai anos, e que se fará realidade en breves coincidindo co pagamento da débeda da Mancomunidade a Sogama". Na mesma liña interveu Juncal ao remate da xuntanza, e salientou que "temos un compromiso coa redución de residuos e co incremento da reciclaxe a través de campañas informativas e a compostaxe" e "estas cifras dannos esperanza, pois demostra que o traballo estratéxico da Mancomunidade, que se afianzou nos últimos meses coa xerente e as mestras composteiras".
A Mancomunidade está implementando moitas iniciativas que camiñan cara á redución do lixo, cunha especial atención á compostaxe, tanto comunitaria como individual nos tres concellos. De feito, a finais de maio recibirán de Sogama un novo lote de 300 composteiros individuais que serán repartidos entre a veciñanza.
Na visita, na que tamén participaron o edil Xosé Leal -xerente da Mancomunidade- e responsables deUrbaser, Domínguez Lino puido coñecer as instalacións de Castiñeiras nas que recentemente se vén de acometer o arranxo do vial de acceso e nos próximos días se comezará coa substitución da planta de transferencia.
Os locais que se adhiran a esta campaña recibirán unha visita do persoal técnico da Mancomunidade, onde se lles informará sobre a dinámica da separación en orixe e a nova sistemática do colector marrón. Ademais farase entrega dun colector para poder realizar a separación dos biorresiduos cunha maior comodidade.