Obxectivo: cero residuos no mar

Loitar contra a contaminación mariña e concienciar á sociedade é o principal obxectivo que se marca a Asociación para a Defensa Ecolóxica de Galicia (Adega) coa súa iniciativa de Limpeza Simultánea de Praias, que esta fin de semana celebra a súa undécima edición.

Precisamente esta iniciativa xurdiu pola problemática que existía nas praias a raíz da contaminación, un feito que se agrava tras a época de verán polo turismo. "Decidimos facer agora as limpezas coindindo co fin do verán, que é cando máis lixo se acumula nas praias, e antes de que veñan os grandes temporais", explica Itziar Díaz, educadora ambiental de Adega e coordinadora das limpezas.

Nestas xornadas de concieciación foron chamados a participar e denunciar esta problemática ambiental os centros de ensino, escolas de surf e mergullo, clubs de piragüismo e vela, pescadores, mariscadoras, concellos do litoral, e entidades de todo tipo de Galicia, tanto públicas como privadas, ademais das persoas particulares.

Pero nesta undécima edición de limpieza simultánea nas praias os que máis participaron foron os centros educativos. Concretamente, nas sete praias do Morrazo nas que se actuou, en catro delas os traballos correron a cargo do alumnado. "En Adega estamos moi abertos ao tema dos colexios. Son moi participativos xa que é unha actividade que lles encaixa cos seus proxectos", puntualiza a educadora ambiental.

Os centros educativos da comarca involucráronse nesta recollida de lixo, actuando en 4 das 7 praias incluídas na iniciativa

Como son as limpezas?

As limpezas son ecolóxicas, non mecanizadas, e tratarán de eliminar boa parte dos residuos que están nas praias coa idea de chamar a atención da sociedade sobre a súa contaminación procedente nomeadamente de terra adentro.

As principais causas desta problemática ambiental débense situar no modelo de consumo e produción baseado no modelo "usar e tirar", a deficiente xestión dos residuos que se xeran e a falta de concienciación dalgúns sectores da poboación. Todo iso provoca que cada ano 10 millóns de toneladas de lixo rematen nos océanos.

Aínda que visualmente as praias parezan limpas e sen grandes residuos, o lixo está aí. É o caso das cabichas, que segundo indicou Itziar Díaz nas praias "estes reisudos están no top 10 de lixo que se retira. Son elementos que ao ollo non o vemos e entón xa nos parece que non hai nada ao igual que os microplásticos. Co temas das cabichas entra en xogo a falta de concienciación", apunta Díaz, que como exemplo, durante a limpeza da praia de Miño, en A Coruña, na que ela participou durante este venres, retiráronse máis de 1.100 cabichas; "Parecía unha praia limpa".

O principal problema, segundo a educadora, é que "non temos a conciencia de deixar a praia mellor do que a atopamos". Por iso, para Adega son fundamentais este tipo de iniciativas para sensibilizar á sociedade coa contaminación, sobre todo nos areais e no propio entorno mariño.

Dende Adega consideran que ademais do propio traballo de sensibilización que realicen como entidade, é fundamental o apoio institucional e a involucración dos mesmos neste tipo de proxectos. "Gustaríanos moitísimo ter máis apoio económico, sobre todo polo tema de ter máis recursos humanos para días como estes. Os colexios, por exemplo, pedíannos que foramos algún de nós para orientalos, pero é imposible porque somos poucos e non temos medios. Somos as persoas que somos", anota Itziar Díaz.

Adega fundouse en 1976 e durante o ano realizan unha serie de campañas e actividades en defensa do medio ambiente.