O primeiro día da campaña extractiva do polbo xa deixaba boas sensacións entre o sector. Un mes despois, as cifras continúan falando de recuperación, estabilidade e optimismo. A última campaña (2021-2022) situouse como a mellor dos últimos anos ao saldarse con máis de 15,5 millóns de euros facturados, uns ingresos que triplican os da campaña 2020-2021, caracterizada por un importante descenso como consecuencia de distintos factores. De feito, as máis de 1.700 toneladas comercializadas nas lonxas da comunidade nese período supoñen máis do dobre que a campaña 2020-2021.
A conselleira do Mar, Rosa Quintana, visitou este martes a lonxa de Bueu, a que máis polbo vende na comunidade galega despois de Ribeira, xunto cos representantes da confraría de pescadores e analizou con eles a evolución desta pesquería nos últimos meses.
Entre xullo do ano pasado e maio deste ano, o prezo medio do polbo, de 9,7 euros o quilo, foi o máis alto das últimas tres campañas en primeira venda. O histórico sitúase na campaña 2017-2018, onde se alcanzaron os 9,93 euros. Estes datos, segundo indicou Quintana, amosan "a boa evolución dun recurso" do que na última campaña a cantidade comercializada duplicou á da campaña 2020/2021.
Lonxa de Bueu
No caso de Bueu, na pasada campaña comercializáronse máis de 106 toneladas de polbo —case o triplo que no período 2020-2021—, cunha facturación que superou o millón de euros.
O prezo medio situouse no 9,7 euros por quilo, o que representa máis dun 45% por enriba da media histórica e constitúe o segundo mellor valor da serie, superado polos 9,93 euros o quilo da campaña 2017-2018.
Campaña actual
Nas cinco primeiras semanas da campaña actual, que deu comezo o pasado 4 de xullo, as vendas de polbo nas lonxas galegas foron de arredor de 230 toneladas, cun prezo medio de 8,8 euros o quilo, o que o sitúa como o terceiro máis alto da serie histórica. "Pensamos que as expectativas deste ano van a ser boas, aínda que é moi cedo para facer unha valoración", anotou a titular do Mar. Con respecto ao prezo, "non chega ao do ano pasado, pero esperamos que vaia repuntando segundo se vaia achegando o mes de Nadal".
Dende o sector tamén falan con optimismo da evolución do recurso no entorno mariño. O patrón maior de Bueu, José Manuel Rosas, invitou a saír ao mar "con cabeciña", xa que en comparación coa campaña do 2020-2021 "hai moito reclutamento este ano. Hai unha barbaridade de polbo pequeno, dos 500 aos 700 gramos, pero hai que deixalo no mar para garantir a campaña do inverno. Aquí as pescas máis imporantes do polbo, cando é máis grande, son durante o inverno".