Quince anos non son un gran lapso de tempo pero, se se trata de poñer en marcha cambios, poden dar para moito. Deste xeito presentou o alcalde de Bueu, o nacionalista Félix Juncal o resumo dos seus tres lustros de mandato no concello bueuense, nun acto no que contou coa presencia da portavoz nacional do partido, Ana Pontón, quen enxalzou o labor do Goberno local deste Concello e o seu poder transformador para mellorar a vida das persoas.
Nun acto en clave preelectoral, Félix Juncal, que ademais este domingo cumpría 54 anos, explicou que con estes tres lustros de mandato, o Goberno que el preside pode dar por "pechado un ciclo" no que se pasou de "coller unha localidade na que imperaba a desesperanza e o escepticismo" e no que "todos os indicadores nos situaban por detrás dos demais concellos" a traballar nun municipio que dá boas "mostras de crecemento", aclarou este domingo, ante de anunciar que "coa mesma humildade coa que me dirixín hai 15 anos aos veciños, volverei a eles para escoitalos, coñecer as súas ideas e iniciar un novo proxecto no que se conteñan as liñas nas que a cidadanía quere avanzar".
Sen saltar os procedementos do partido, que aínda non iniciou a designación de candidatos, Juncal si que avanzou que "despois dunha profunda reflexión, tamén a nivel familiar e de partido, estou preparado non só para ser candidato senón para liderar un novo plan transformador que pode estenderse varias lexislaturas".
O alcalde contou co aplauso de simpatizantes e afiliados e de Pontón, quen ademais de falar do labor dos nacionalistas fixo un amplo repaso ao panorama actual censurando aos grandes partidos por non atopar solucións efectivas que lle eviten á cidadanía os custes das crises actuais.