O vicepresidente primeiro da Xunta de Galicia, Alfonso Rueda, apelou este martes ao "sentidiño" da poboación de cara ás festas do Nadal, para as cales ve "complicado baixar o nivel de restricións" para loitar contra a pandemia.
Durante un acto celebrado en Marín, o número dous do Goberno galego referiuse á próxima reunión do comité clínico que o vindeiro venres vai analizar os datos epidemiolóxicos do covid-19, especialmente os referidos a esta ponte festiva, "e en función diso tomar decisións".
O vicepresidente primeiro indicou que, a tres días desa reunión, "non hai nada a priori decidido" sobre a aplicación de novas medidas, aínda que entende que será "complicado baixar o nivel de restricións".
"Estamos a ver o que pasa ao noso ao redor, o que pasa en moitos países de Europa que nos rodean e por tanto o que temos que ter é moitísimo sentidiño", insistiu.
Alfonso Rueda fixo un chamamento á poboación galega para que manteña as medidas de prevención, que son "sinxelas, elementais case pero absolutamente imprescindibles".
No transcurso deste acto en Marín, o vicepresidente primeiro da Xunta destacou que "onde poden estar as persoas máis vulnerables xa se tomaron medidas", como é no ámbito sanitario ou naqueles lugares "onde nalgún momento se saca a protección principal, que é a máscara".
Rueda fixo referencia expresa á hostalaría, que é "onde estamos a aplicar basicamente as restricións que agora mesmo están en vigor".
Ademais, lembrou que nos próximos días "empezará a vacinación dos nenos menores de 12 anos" xa que "o luns van chegar ao redor de 60.000 vacinas". "Aí empezaremos a vacinar a ese colectivo", asegurou.
