Un grupo de 60 alumnos de 1º de ESO do IES Valle Inclán de Pontevedra tiveron onte ocasión de coñecer de primeira man o funcionamento da lonxa de Portonovo. A actividade que desenvolven os mariñeiros, as artes que utilizan no seu día a día, o sistema de poxas, a comercialización e as especies que se poden mercar nestas instalacións foron algunhas das cuestións que se trataron nunha visita que tivo á conselleira de Mar, Rosa Quintana, coma mestra de cerimonias.
Acompañada polo patrón maior da Cofradía de Pescadores San Roque, Juan José Besada, a titular do departamento autonómico explicou aos rapaces cales son as pautas que hai que seguir, por exemplo, cando se toma parte nunha subasta. "É moi importante coñecer o labor que se desenvolve no mar e temos que saber valoralo", sinalou. Os rapaces exerceron de mercadores nunha poxa improvisada, na que se puñan á venda especies típicas deste enclave das Rías Baixas como a rincha, a pescada ou o lirio. Os estudantes comprenderon rapidamente que os prezos que se ofrecen deben ser competitivos e asequibles, xa que, posteriormente, "hai que sacarlle valor nos establecementos". Mentres escoitaban estas explicacións, os cativos permanecían moi pendentes das pantallas de información sobre as características dos produtos e ían facendo as súas propostas, ata ofrecer prezos moi razoables.
Quintana tamén se mostrou moi interesada en coñecer se o peixe é un dos ingredientes habituais no menú diario dos mozos do IES Valle Inclán. Neste sentido, a conselleira de Mar fixo moito fincapé na importancia de consumir este tipo de especies, xa que "son fundamentais para a nosa saúde".
CITA CONSOLIDADA. A visita de onte a Portonovo forma parte do programa "O sabor da aventura no mar", posto en marcha hai nove anos pola Xunta de Galicia, coa meta de impulsar o consumo de produtos marítimos entre os máis cativos, xa que "teñen un baixo contido calórico, son ricos en ferro e vitamina D e tamén en ácidos graxos Omega-3", sinalou a representante da Administración autonómica. En todo caso, a excursión realizada á lonxa da vila sanxenxina tamén pretendía amosar aos rapaces todo o proceso que se debe completar desde o intre no que se realizan as capturas "ata que os alimentos chegan ás nosas casas", recalcou Rosa Quintana. Ademais, os alumnos do IES da capital de provincia tiveron a oportunidade de gozar dunha degustación, celebrada nunha das salas dunha lonxa que foi reformada hai uns anos grazas a un forte investimendo realizado pola Xunta de Galicia.
Desde a súa posta en funcionamiento en 2010, "O sabor da aventura no mar" contou coa participación de máis de 51.000 nenos de toda Galicia. Só durante o pasado curso lectivo tomaron parte neste tipo de iniciativas uns 15.000 estudantes aproximadamente.
Ademais, en 2017 a Comisión Europea puxo como exemplo esta iniciativa á hora de salientala como unha das actividades máis importantes correspondentes a proxectos financiados por Bruxelas.
