Un grupo de música urbana do Grove provocou unha gran polémica en Cambados por un graffiti realizado no campo de fútbol de Castrelo durante a gravación dun videoclip, que foi despublicado despois de lanzarse o domingo en redes sociais e YouTube.
Os integrantes da formación accederon sen permiso ás instalacións, onde disputan os seus partidos o Beiramar CF, e pintaron un dos muros próximos á cantina sen contar con autorización para facelo.
DENUNCIA. Os feitos foron denunciados polo Concello cambadense ante a Garda Civil, que xa identificou aos seis compoñentes de banda. A pesar de que o goberno local entende que este non é un acto grave, si consideran que as formas non son as adecuadas, polo que decidiron tomar cartas no asunto coa finalidade de evitar que a acción se repita no futuro.
Agora, os artistas enfróntanse a unha infracción administrativa e poderían ter que asumir os custes do repintado do muro.
"ISO NON SE FAI". Pola súa banda, a veciñanza amosu a súa indignación por esta actuación ante as cámaras da TVG. "Nós tiñamos un letreiro aí polo que pagamos e tapárono. Iso non se fai porque non é arte, é vandalismo", denunciou unha muller.
Outras dúas persoas consultadas pola TVG coincidiron en expresar un profundo malestar polo feito de que os integrantes do grupo grovense se meteran "nun lugar público e pintasen onde non deben", ademais de "prexudicar a outros": "¿Por que pintar por riba do que xa estaba pintado".
