O Colectivo Ecoloxistas do Salnés vén de denunciar a situación dun establecemento de restauración que se atopa preto dun miradoiro ubicado na parte norte da Lanzada e que, segundo explican, "está a aumentar a súa superficie de terrazas paulatinamente, ao longo de máis de 15 anos, ocupando cada vez máis superficie e creando distintos espazos de mesas, aparcamentos, zonas cubertas e pistas de acceso".
Segundo o colectivo, "o que comezou sendo un pequeno restaurante ao carón da estrada, que apenas supoñía un impacto visual, está a converterse nun impacto paisaxístico e ambiental, debido á ocupación da costa con megaterrazas, forte iluminación, movementos de terras e cortas de árbores e vexetación".
Deste xeito, aseguran que o establecemento atópase dentro da zona de servidume de protección de Costas, polo que xa pediron por rexistro á entidade información sobre a autorización do Servizo Provincial de Costas "para a ocupación desta franxa costeira pública". Ademais, remitiron un escrito solicitando información sobre a legalidade urbanística de ditas ocupacións á Axencia de Protección da Legalidade Urbanística (APLU), e outro escrito á Consellería de Medio Ambiente solicitando copia dos permisos pola corta de árbores na zona, así como "as medidas que pensan tomar sobre este impacto".
