As obras de instalación do sistema de rega e a renovación do céspede no xardín da praza de España comezan mañá a cargo da empresa Viveiros O Piñeiro.
A actuación conta cun presuposto de 11.762 euros, dos cales 3.837 destínanse ao sistema de rega e 7.925 á reforma da zona verde. O obxectivo é mellorar a drenaxe natural das zonas de terra do xardín.
Este diñeiro será sufragado con cargo ao aval que depositara no seu día Stradia SL, a empresa adxudicataria do proxecto orixinal.
A Xunta de Goberno local rexeitou o luns pasado os derradeiros recursos presentados por esta firma contra a decisión de executar o aval. O Goberno ocal segue mantendo que o mal estado do céspede debeuse á falta de mantemento que Stradia se comprometera a realizar durante os primeiros doce meses unha vez recibida a obra, algo que non fixo.
As obras de reforma foron adxudicadas polo Goberno de Tomás Fole en outubro de 2014. A anterior Corporación tivera en conta as melloras que oferta Stradia SL, como o incremento do prazo de garantía de 12 a 24 meses e o mantemento e conservación da zona axardinada e a reparación do sistema de rega durante dous anos.
Mais, segundo se relata no informe do arquitecto, a realidade foi moi distinta, o que explica a execución do aval e a contratación da firma Viveiros O Piñeiro tralo correspondente concurso.
