A Policía Local de Vilagarcía de Arousa detivo na madrugada deste mércores a un individuo acusado de cometer un roubo con forza nunha mutua da cidade. O detido, un home de 38 anos que responde ás iniciais de O.P.A, foi visto por unha persoa cando abandonaba as dependencias violentadas, situadas na Rúa Fariña Ferreño, sobre ás catro da madrugada cunha pantalla de televisor baixo o brazo.
A testemuña foi quen deu aviso á Policía que se presenciou no lugar do suceso en poucos minutos. Os axentes detiveron pouco depois ao individuo a escasos metros do lugar , concretamente no Parque Celso Emilio Ferreiro.
Ao parecer, o ladrón trataba de fuxir do lugar do roubo montado nunha bicicleta. Cando o interceptou a Policía Local atopóuselle a bici, pero non a pantalla, pese a terse feito un recoñecemento do lugar. O detido foi entregado á Policía Nacional para pasar a disposición xudicial ao longo do día.
