martes. 02.03.2021 |
El tiempo
martes. 02.03.2021
El tiempo

As dornas de Portonovo piden mar

Praia da Panadeira, unha nova dorna na familia. DP
Praia da Panadeira, unha nova dorna na familia. DP
Tras ver alterada toda a súa actividade a raíz da pandemia, a asociación de Portonovo Amigos da Dorna reivindica agora, de xeito máis contundente que nunca, a necesidade de crear un museo flotante no porto para "poñer en valor" as embarcacións tradicionais que conserva, e que considera un "legado de toda a veciñanza"

'JATIÑA', 'Bicoca', 'Coninha' e, por suposto, a famosa dorna nai, 'Surfeira', son algunhas das oito embarcacións tradicionais que atesoura a asociación Amigos da Dorna, que leva décadas velando pola preservación destas pezas, que considera un "legado de todos os veciños e veciñas de Portonovo".

Detrás de cada recuperación dalgunha destas embarcacións típicas da zona hai un traballo de restauración a conciencia, co obxectivo de devolvelas ao mar para que os veciños e veciñas "poidan gozar delas". Así o explica o vicepresidente da asociación, Alejandro Piñeiro, que durante os últimos meses viu paralizada toda a actividade do colectivo, como a XII Regata Sepelo, o Desembarco en Ons, a xuntanza de setembro ou o curso de navegación, a pesar de que a preocupación pola preservación das dornas non descansou no seo da asociación. "Estivemos facendo o traballo de mantemento dos barcos como calquera ano, porque ao ser labores que facemos en pequenos grupos non houbo problema", explica o vicepresidente, que destaca que "a pesar de ter barcos xa preparados para estar a flote, eramos conscientes de que non iamos poder darlle un uso normalizado, polo que algúns quedaron gardados e deixamos dous máis pequenos para saídas individuais no mar, ademais da Surfeira, que polo seu tamaño non podemos ter gardada".

Emprazamento do futuro museo flotante, solicitado pola asociación. ADNeste sentido, a asociación urxe á creación dun museo flotante, unha actuación que levan demandando á beira dunha década para poder manter as embarcacións no porto de Portonovo, ao alcance de veciños e veciñas, posto que son "patrimonio de todos eles".

O PROXECTO. O museo flotante que demanda a asociación Amigos da Dorna emprazaríase no mesmo porto de Portonovo, no lugar onde se amarran normalmente as embarcacións da asociación. "Queremos acondicionalo para que as embarcacións sexan visitables, e incluso organizar un calendario de visitas guiadas alí. Trataríase de aproveitar o recurso que temos, que son as embarcacións, e ademais teñen o recoñecemento de bens patrimoniais, para crear un punto de interese en Portonovo, vinculado a ese patrimonio que nos gusta", explica o vicepresidente, que busca "dinamizar ese punto de interese coas visitas".

A asociación leva anos perseguindo este proxecto, para o que agora xa ten permiso de ocupación, unha fase na que tiveron que contar co consenso da Confraría, a asociación de mariñeiros xubilados e o club náutico, para que Portos de Galicia os autorizase. "Conseguida a autorización queda unha parte igualmente importante, como é o acondicionamento da instalación. Sabemos que Portos de Galicia non vai investir niso, porque debido ás nosas taxas reducidas, non o van recuperar". Por este motivo, buscan agora a colaboración do Concello de Sanxenxo que, "en principio está apalabrada. O alcalde transmitiunos que lle parecía unha cuestión importante e que quería apoiala", explica.

O Concello de Sanxenxo xa aprobara hai uns anos unha moción en Pleno por unanimidade para apoiar esta cuestión. No sucesivo, "falta levalo á realidade", unha actuación que pasaría polo apoio económico do Concello para a instalación duns brazos de amarre e a mellora da instalación para garantir a súa seguridade e accesibilidade, ademais da instalación de paneis informativos. O vicepresidente confirmou que agardan reunirse nas vindeiras semanas para tratar o tema.

Amigos da Dorna traballa con outras asociacións de talle galego a través da federación Culturmar, pola preservación das embarcacións tradicionais. "Noutros portos como Combarro ou Muros van máis adiantados, e non queremos quedarnos atrás. Sobre todo, porque hai un compromiso de crear unha rede de mariñas tradicionais", asegura.

As dornas de Portonovo piden mar
Comentarios
ç