sábado. 21.09.2019 |
El tiempo
sábado. 21.09.2019
El tiempo

Dúbidas sobre o enganche do polígono de Nantes coa EDAR de Dena

Representantes do PSOE, ás portas da depuradora situada no concello de Meaño. RAFA FARIÑA
Representantes do PSOE, ás portas da depuradora situada no concello de Meaño. RAFA FARIÑA

En Marea esixirá a Augas que aclare cal é a capacidade da depuradora e o PSOE se terá consecuencias para Os Pasales

O impacto que pode ter a posta en marcha do polígono empresarial de Nantes, cuxa recepción por parte do Concello farase efectiva en breve, é motivo de preocupación para Somos En Marea Sanxenxo e o PSdeG-PSOE. Tanto é así que ambos colectivos confirmaron onte que levarán este tema ao Parlamento. Mentres que a formación vencellada a En Marea ten previsto esixir a Augas de Galicia "un informe serio que amose cal é a capacidade actual da EDAR dos Pasales", os socialistas tamén se comprometen a preguntarlle á Xunta de Galicia de que xeito pode afectar a conexión do saneamento do parque industrial coa depuradora situada na parroquia meañesa de Dena.

A portavoz de Medio Ambiente do PSOE, Patricia Vilán, visitou onte a EDAR, acompañada do parlamentario Julio Torrado e das responsables das agrupacións socialistas de Sanxenxo e Meaño, Ainhoa Fervenza e Icía García. Vilán asegurou que a depuradora "está xa saturada", polo que teme que, en caso de prestar tamén servizo ás empresas que se asenten no SU 15 de Nantes, "se poña en risco a Zona de Especial Conservación de Os Pasales". Ademais, a representante do PSdeG-PSE non ocultou a súa sorpresa polo feito de que Augas de Galicia emitise agora un informe favorable sobre a conexión, cando hai apenas dous anos descartou esta posibilidade. "Precisamente, o polígono estivo paralizado pola falla de conexión cona EDAR", precisou Vilán, que tamén lembrou que o Concello de Meaño tampouco era partidario desta medida.

Sobre o anuncio feito polo alcalde de Sanxenxo, Telmo Martín, da posta en marcha do parque empresarial, Patricia Vilán asegurou que "(Martín) estase a erixir como voceiro da Xunta, posto que fai un auncio que afecta a outra Administración local e que vai en contra dos informes negativos feitos por un organismo autonómico como é Augas de Galicia". Ademais, os socialistas tamén esixen ao Goberno de Alberto Núñez Feijóo que se dirixa a Meaño para iniciar as obras de desdobramento das canalizacións de augas pluviais e residuais que chegan á Estación Depuradora de Augas Residuais de Dena.

"BANDAZOS DO PP". Mentres que os representantes do PSOE pasaban revista á depuradora ao longo da tarde, pola mañá foron varios os integrantes de En Marea que se achegaron ata o parque empresarial de Nantes. Entre eles atopábanse os parlamentarios Julia Torregrosa e David Rodríguez, ademais da responsable logal de Somos En Marea Sanxenxo, Mary Camiña. Ante "os constantes bandazos do Partido Popular", a formación liderada a nivel autonómico por Luís Villares comprometeuse a solicitar a Augas de Galicia que aclare, a través de documentos "serios", a capacidade actual da depuradora situada nos Pasales, "a cal desemboca nunha zona protexida, en plena ría de Arousa".

Ao igual que o PSOE, en Marea amosa a súa sorpresa polo feito de que "en igualdade de condicións, hai uns anos o informe foi desfavorable para levar a cabo esta actuación". Ademais, Somos instará ao Concello de Sanxenxo a que "publique cal foi o destino dos cartos do aval incautado hai sete anos, así como o estudo de Augas favorable ao enganche".

Dúbidas sobre o enganche do polígono de Nantes coa EDAR de Dena
Comentarios