Aínda que en formato reducido, o Festival Revenidas, xa unha data marcada na programación cultural de final de verán, celebrarase os vindeiros días 10, 11, 12 e 13 de setembro na localidade costeira de Vilaxoán de Arousa.
Esta edición ‘en conserva’ combinará actividades de balde, vencelladas ao territorio e á cultura mariñeira e popular da vila, con catro concertos de pago, cuxos artistas foron confirmados o pasado xoves.
Así, o venres 11 os asistentes poderán gozar das letras de Sés e do folk e blues/rock de Zeltia Irevire. mentres que o sábado 12 será a quenda da cumbia de Ortiga e do compromiso de Dakidarría en acústico.
Tamén terán oco nesta particular edición as habituais demostracións culinarias, os roteiros e os espectáculos de circo, que completan a programación.
Por outra banda, a organización do festival quixo premiar a aqueles que decidiron conservar a súa anterior entrada de cara ao 2021, poidendo acceder desde onte e até o martes 25 ás 12.00 horas a unha prevenda con desconto para os seus tickets do ‘Revenidas en conserva’. Desde ese día, todo o público xeral poderá adquirir tamén unha entrada na páxina web do festival, até completar o aforo de 500 asistentes.
Porén, os que xa tiñan ganas de desfrutar de música feita por artistas do país e buliron para conseguir a súa entrada antes de que se esgotaran, teñen unha cita este venres, ás 22.00 horas no parque da Xunqueira de Vilagarcía, con Guadi Galego. A artista érguese actualmente como unha das figuras máis relevantes do panorama musical galego, tendo sido recoñecida en múltiples ocasións pola crítica, tanto do país como do estado, e polos galardóns, recibindo en 2016 o Premio Martín Códax da Música á Mellor Artista na categoría de Canción de Autor.
O concerto enmárcase no programa cultural da Deputación de Pontevedra, ‘Musigal 2020’, que ten como obxectivo contribuír á difusión e promoción da música galega e en galego, así como fomentar a defensa da igualdade e favorecer a programación artística nos concellos da provincia.
