Tres días despois da apertura da III edición dos bonos-compra Son da Casa! xa se adquiriron case a terceira parte do total dos paquetes emitidos. Dos 3.750 lotes abertos á venda o venres, o domingo pola noite xa estaban vendidos 1.100, tal e como informaron dende o Concello de Vilagarcía, que fai un balance positivo da iniciativa. "Demostra o interese e a aceptación que a iniciativa municipal ten entre a cidadanía que, investindo 20 euros nos bonos pode facer compras por valor de 30 grazas aos 10 euros que o Concello engade en cada lote co obxectivo de incentivar o consumo e dinamizar a economía local, tras o retraemento ocasionado pola pandemia", explicaron.
A medida, que se enmarca no Plan de Promoción e Reactivación da Economía Vilagarcía 21, está a ter éxito mediante a venda online. Os 1.100 packs de bonos vendidos nesta primeira fin de semana correspóndense na súa totalidade á venda a través da web sondacasa.vilagarcia.gal, posto que a venta presencial prevista para o sábado tivo que suspenderse debido á choiva. Neste sentido, o vindeiro sábado haberá punto de venda na Praza de Galicia para aquelas persoas que non teñan acceso aos medios dixitais ou teñan dificultade para mercar telematicamente.
A edición primaveira-verán remata o 31 de xullo, data ata que os compradores dos bonos poden gastalos en calquera dos 200 establecementos hosteleiros, comerciais e pequenos negocios de servizos adheridos á campaña. Estes establecementos poden identificarse a través da cartelería da campaña, que deben ter visible en portas e escaparates, e tamén se pode consultar a lista completa na propia web de "Son da Casa!".
Para participar hai que ser maior de idade e non adquirir máis de dous packs por persoa, para o cal, durante a compra, debe aportarse o DNI.