Despois de formarse en preparación maternal na auga, a matrona de Sanxenxo, María Dolores Rodríguez García, que exerce actualmente no centro de saúde de Baltar, comezou a darlle voltas á idea de sacar adiante un curso destas características ao sentar praza na Atención Primaria. Tras chegar ao municipio, e cunha pandemia polo medio, a sua iniciativa vén de facerse realidade grazas á colaboración do Sergas e do Concello de Sanxenxo, cun grande éxito entre as xestantes do municipio, que actualmente suman 64, das que participan arredor de 20.
Trátase dunha iniciativa pioneira na área sanitaria de Pontevedra-O Salnés, e Sanxenxo é o único municipio no que se realiza, con epicentro na piscina municipal, situada en Baltar (Portonovo). "Estou moi agradecida. Pedín permiso ao Concello e á xerencia da área sanitaria, e pareceulles moi interesante. A preparación na auga permite realizar movementos que en terra non se poden facer por risco de lesión, e é moi beneficiosa para a pelve e para o traballo de parto", explica Rodríguez.
A actividade realízase en dúas sesións o primeiro e o terceiro venres de cada mes, de 12.30 a 14.00 horas, a partir da semana 28 de xestación, polo que o número de alumnas fluctúa segundo avanzan no proceso. Pero non só se trata dunha preparación física, "senón tamén mental". Tal e como asegura a matrona, ao remate de cada unha das sesións "temos en conta á persoa que se despide, dámoslle ánimos e procuramos que leve un bo recordo deste apoio cando esté nos momentos difíciles".
As clases, que na súa primeira sesión contaron con 10 mulleres, e na segunda con oito, teñen como obxectivo trasladar á auga toda esa parte práctica que complementa á teórica. "Facemos un quecemento de cinco minutos para exercitar a musculatura e, na auga, durante 30 minutos, exercicios de resistencia, forza, aeróbicos e de pelve, que facilitan o encaixe do bebé, encamiñados a un mellor traballo de parto, e incluso exercicios por equipos. Procuro que cada día sexan diferentes. Sempre temos novas alumnas, e na auga tamén facemos as presentacións delas e do bebé", explica. A actividade que, asegura, "irá evolucionando", é o complemento perfecto ás charlas nas que Rodríguez procura "contar cunha persoa externa que aporte coñecementos de todo tipo, como sistemas de retención infantil, ou axudas económicas, e tamén damos teoría do parto ou a lactancia, sempre con perspectiva de xénero e parentalidade positiva".
Só en Sanxenxo, a matrona atende potencialmente a unhas 8.000 mulleres, polo que a súa actividade non vai só encamiñada ás xestantes. Tal e como explica, "a función das matronas cambiou moito, máis alá do embarazo e o parto. Atendo a mulleres de todas as idades reprodutivas e sexuais, e incluso teño a unha paciente de 93 anos".