Cambados acolle cada ano a miles de visitantes e veciños que se reúnen para gozar do viño Albariño, da alegre compañía e da ledicia que trae a festa nuns días que están acompañados sempre polo sol das Rías Baixas.
A Festa do Albariño, declarada de Interese Turístico Nacional, iniciouse, ás 13.00 horas no balcón do Concello, co pregón de Mercedes Álvarez, presidenta de GaliciaAME. A 66ª edición do popular evento inaugurouse oficialmente coa apertura das casetas de degustación, ás 13.30 horas no céntrico Paseo da Calzada.
Pola tarde, o actor Avelino González deleitará aos presentes cun monólogo no Monte da Pastora, ás 18.00 horas. Simultaneamente, Iván Barral estará na Praza Alfredo Brañas.
TROULA A RITMO DE FOLK. A música soará en diversos lugares característicos da vila, como o Cemiterio de Santa Mariña, no que actuará o cuarteto Lulavai ás 20.00 horas.
O punto forte musical da noite estará protagonizado polo folk do coñecido artista vasco Kepa Junkera, ao que acompañará a formación Sorginak, composta por dez mulleres que cantan, bailan e tocan percusión. Terán como convidados no escenario, entre outros, ao músico Pedro Lamas e aos cambadeses Xaquín, Anxo e Roi Xesteira, na Praza de Fefiñáns ás 22.00 horas.
Na Praza do Concello haberá verbena, ás 22.30 horas, coa orquesta Finisterre.
Reforzo nos servizos de limpeza e de seguridade
O Concello de Cambados colabora este ano con Ecovidrio co obxectivo de mellorar e aumentar a limpeza e a seguridade da Festa do Albariño. Instaláronse quince contedores de vidro por toda a vila, cinco máis que o ano pasado, e agárdase acadar o 100% na reciclaxe.
Ecopatrullas e monitores
Tamén se contará con dous equipos de patrullas que axudarán na recollida dos envases, ademais de monitores que concienciarán aos asistentes sobre o necesario coidado do medio ambiente.
