O parque do Castriño acollerá este domingo, por segundo ano consecutivo, a romaxe Folk no Alobre, un evento organizado pola asociación Pés de Barro en colaboración co Concello de Vilagarcía.
Comezará as 11.00 da mañá, hora á que se realizará unha visita guiada ao Castro de Alobre e ao parque Enrique Valdés Bermejo. Ás 12.00, os asistentes poderán participar no Obradoiro de Construción de Instrumentos de Cana, cuxa finalidade é recuperar antigos xoguetes de forma respectuosa co medio ambiente.
O Xantar demorado está previsto para as 14.00 horas e estará amenizado por Cé Orquestra Pantasma. Os asistentes poderán levar a comida da casa ou ben comprala nos postos instalados no propio lugar.
Dúas horas despois, ás 16.00, a bailarina Rocío García impartirá o Obradoiro de Danzas do Mundo, cuxo obxectivo é fomentar a cultura participativa do baile.
A última actividade da romaxe Folk no Alobre será o festival de música, que comezará ás 18.00 horas. O parque Enrique Valdés Bermejo servirá de escenario ao cuarteto de música tradicional Os demos da petaca, ó trio de Tres pesos, á innovación folk de Ardentia e ás letras reivindicativas ao son de pasodobres ou muiñeiras de Tanto nos ten. A hora de remate destes concertos está prevista entre as 23.30 horas e as 00.00 horas da noite.
A realización deste evento ten por obxectivo "recuperar unha romaría urbana, sen perder a esencia principal da romaría galega", coincidiron tanto a concelleira de Cultura, Sonia Outón, como o presidente do colectivo cultural que organiza o evento, Xosé Lois Lucio.