miércoles. 23.06.2021 |
El tiempo
miércoles. 23.06.2021
El tiempo

Sanxenxo reivindica a Emilia Pardo Bazán polos cen anos do seu pasamento

Colocarase unha réplica da escultura da autora no exterior do Concello. DP
Colocarase unha réplica da escultura da autora no exterior do Concello. DP
O auditorio ao que lle dá nome acollerá unha variada programación cultural a vindeira semana

En Sanxenxo o centenario do falecemento da ilustre escritora Emilia Pardo Bazán, que se cumpre o 12 de maio, non pasará desapercibido. O municipio, ao que estivo "moi vencellada", rendiralle homenaxe baixo o lema Cen anos sen Emilia. A Concellería de Cultura, dirixida por Paz Lago, xa ten pechados os actos que axudarán a rememorar a pegada da escritora nos distintos eidos culturais nos que destacou a e que terán como localización o Pazo municipal que leva o seu nome.

A biblioteca do Pazo Emilia Pardo Bazán reservará dende o vindeiro 11 de maio e ata o 30 de xuño un espazo destacado para amosar a amplia bibliografía da escritora con exemplares de exposición dos distintos títulos e xéneros. Cultura ampliou con motivo do centenario o seu fondo bibliográfico para completar unha colección cunha edición dos exemplares moi coidada.

O equipo de animación sociocultural será o encargado de subir ao escenario do Pazo unha adaptación teatral de Lorito Real con dúas sesións, ás 17.30 e 18.30 horas, con entrada de balde ata completar aforo. Esta actuación servirá de preámbulo á charla coloquio que terá lugar na biblioteca El universo de Emilia...a través del cristal, ás 20.00 horas, coa ilustradora Bea Gregores e a mestra Ángeles Marcos. O mércores 12, Sanxenxo lembrará a escritora dándolle voz á súa obra coa lectura de fragmentos de Os Pazos de Ulloa no exterior do auditorio en dúas quendas, de 11.00 a 13.00 horas e de 17.00 a 19.00 horas. Os interesados en participar deberán inscribirse no 986 727 936.

Nos descansos da lectura haberá intervencións musicais da Escola de Música Municipal e os alumnos do Centro de Arte culminarán durante esta xornada o pintado da réplica en escaiola da figura da autora que se atopa no exterior do Pazo, e na que levan traballando minuciosamente dende hai semanas, para instalala no exterior do edificio consistorial co obxectivo de dar a coñecer a vinculación da escritora con Sanxenxo xunto a un texto explicativo. A Asociación Cultural Soalleira de Dorrón aportará outra perspectiva da autora cun audiovisual que colgarán nas súas redes A pegada de Emilia Pardo Bazán no folclore galego e ás 20.30 horas o autor Marcelino Agís presentará o libro Emilia Pardo Bazán: La escritora en Miraflores. 

Sanxenxo reivindica a Emilia Pardo Bazán polos cen anos do seu...
Comentarios
ç