viernes. 28.02.2020 |
El tiempo
viernes. 28.02.2020
El tiempo

Sanxenxo renova o contrato da auga un ano para estudar un novo concurso

O alcalde, Telmo Martín, no transcurso dunha sesión plenaria, este ano. CERVERA-MERCADILLO
O alcalde, Telmo Martín, no transcurso dunha sesión plenaria, este ano. CERVERA-MERCADILLO
BNG e Ciudadanos criticaron ao Goberno pola tardanza na redacción do documento

O Goberno local aprobou este venres en Pleno Extraordinario a continuidade do Servizo de Auga, Saneamento e Depuración por un prazo de 12 meses, co obxectivo de preparar un novo prego para sacar a concurso a prestación do servizo. Segundo explicou o alcalde, Telmo Martín, as opcións do Goberno eran aprobar unha nova prórroga de 10 anos ou a continuidade de 12 meses da empresa concesionaria para a redacción dun novo documento. Esta circunstancia deuse debido ao retraso co que se levou a cabo a valoración da medida, xa que o contrato coa concesionaria vén de finalizar recentemente.

A edil de Planificación Territorial, Silvia Deza, explicou que "hai un compromiso por parte do Goberno de non deixar ningunha vivenda sen servizo", en referencia a que 720 vivendas do rural carecen de Saneamento. Por iso, a proposta do Goberno foi a redacción dun novo prego e a continuidade do servizo por un ano, ata que se poida sacar un novo concurso.

A portavoz do BNG, Sandra Fernández, quixo aclarar que "non hai cabida de prórroga, senón de continuidade. Se non, prevaricariamos todos. A última foi en 2009 e non ten cabida ningunha outra", asegurou. Ademais, criticou que "o normal na previsión dun Goberno sería que agora estivesemos falando dunha licitación. Para un Goberno responsable, o normal sería ter o prego feito, que ademais vai ser longo e engorroso ao tratar con normativas europeas". "Este punto do día tiña que ter saído no Pleno de decembro", engadiu. A portavoz de Ciudadanos, Vanessa Rodríguez, tampouco quixo pasar por alto que "agora estamos en precario. Hai un deixamento da xestión, porque este periodo mínimo utilízase en situacións que se saen da normalidade. Polo tanto, o normal sería ter o prego sacado", explicou.

O Pleno Extraordinario aprobou tamén a renovación da concesión da Recollida de Residuos Sólidos por un prazo de tres anos

A portavoz do PSDG-PSOE, Ainhoa Fervenza, chamou ao Goberno a cumprir os prazos na redacción do documento, ao que o alcalde respondeu que o prego estaría listo "no mes de outubro, e se non o 31 de decembro, xa que é un tema moi complicado". A sesión pechouse con 13 votos a favor e dúas abstencións por parte do BNG.

No Pleno Extraordinario tamén se aprobou a renovación da concesión da Recollida de Residuos Sólidos, por 14 votos a favor e dúas abstencións. O servizo continúa durante tres anos, con posibilidade de prórroga a dous máis.

Sanxenxo renova o contrato da auga un ano para estudar un novo...
Comentarios